മലയാളികൾക്ക് ഏറ്റവും ഇഷ്ടപ്പെട്ട യുവതാരങ്ങളിൽ ഒരാളാണ് ഉണ്ണി മുകുന്ദൻ. മാളികപ്പുറം എന്ന ചിത്രത്തിന്റെ വമ്പൻ വിജയത്തിന് ശേഷം കുടുംബ പ്രേക്ഷകരുടെ മനസിലിടം നേടാനും ഉണ്ണിക്ക് കഴിഞ്ഞു. സോഷ്യൽ മീഡിയയിൽ ഏറെ സജീവമായ നടന്റെ ചിത്രങ്ങളും വീഡിയോകളും ഇരുകൈയ്യും നീട്ടിയാണ് ആരാധകർ സ്വീകരിക്കാറുള്ളത്. ഇപ്പോഴിതാ നടൻ പങ്കുവച്ച ഒരു പഴയകാല ഓഡിഷൻ ടേപ്പ് വീഡിയോയും വൈറലായിക്കൊണ്ടിരിക്കുകയാണ്.
റീൽ രൂപത്തിലാണ് ഉണ്ണി വീഡിയോ പങ്കുവച്ചിരിക്കുന്നത്. രാവിലെയാണ് ഈ ദൃശ്യങ്ങൾ വീണ്ടും തന്റെ പക്കൽ വന്നുചേർന്നതെന്നും അദ്ദേഹം അടിക്കുറിപ്പെഴുതിയിട്ടുണ്ട്. എഡിറ്റ് ചെയ്യാത്ത ദൃശ്യങ്ങളിൽ രണ്ട് പേരുടെ സംഭാഷണമാണുള്ളത്. ഇതിൽ ഉണ്ണിയുടെ ഭാവാഭിനയം ഫോക്കസ് ചെയ്യുന്നതാണ് വീഡിയോ. ഈ ദൃശ്യങ്ങൾ വെള്ളിത്തിരയിൽ എത്തിയില്ലെന്നും ഉണ്ണി മുകുന്ദൻ ഓർമ്മിപ്പിച്ചു. യാതൊരു എഡിറ്റുമില്ലാത്ത ഇത്തരം വീഡിയോ ക്ലിപ്പുകൾ തനിക്കിഷ്ടമാണെന്നും റീൽസിന് താഴെ അടിക്കുറിപ്പെഴുതിയിട്ടുണ്ട്.
