എറണാകുളം: അവയവദാന തട്ടിപ്പ് കേസന്വേഷണത്തിന്റെ ആദ്യ ഘട്ടത്തിൽ നടന്നത് പോലീസും ആശുപത്രി അധികൃതരും തമ്മിലുള്ള ഒത്തുകളി. തട്ടിപ്പ് കേസ് ആദ്യം അന്വേഷിച്ച കോതമംഗലം എസ് ഐ. പി കെ. ശിവൻ കേസിലെ സുപ്രധാന ആരോപണങ്ങളൊന്നും പരിശോധിച്ചിരുന്നില്ല. അപകടം പറ്റിയ എബിനെ ചികിത്സിച്ച ഡോക്ടർമാരുടെ മൊഴിയെടുക്കാൻ പോലും അന്വേഷണ ഉദ്യോഗസ്ഥൻ തയ്യാറായില്ലെന്ന് കേസിലെ പുനരന്വേഷണ റിപ്പോർട്ടിൽ പറയുന്നു. കോതമംഗലം സി ഐ ആലുവ റുറൽ എസ് പിക്ക് സമർപ്പിച്ച പുനരന്വേഷണ റിപ്പോർട്ടിലാണ് പോലീസ് ഉദ്യോഗസ്ഥനെതിരെ ഗുരുതര ആരോപണങ്ങൾ ഉള്ളത്.
ലേക്ഷോർ ആശുപത്രിയിലെ സർജൻ ഡോ. ബി വേണുഗോപാൽ, ലേക്ഷോറിൽ എബിനെ ചികിത്സിച്ച ഡോ. സജി പി അഗസ്റ്റിൻ, ഡോ. സായി സുദർശൻ, എബിനെ ആദ്യം ചികിത്സിച്ച കോതമംഗലം മാർ ബേസിലിയോസ് ആശുപ്പത്രിയിലെ ഡോ. പി കെ ഏലിയാസ് പോസ്റ്റ്മോർട്ടം പരിശോധന നടത്തിയ പോലീസ് സർജൻ ഡോ. പി എസ് സഞ്ജയൻ എന്നിവരുടെ മൊഴി എടുക്കാൻ കേസിൽ ആദ്യം അന്വേഷണം നടത്തിയ ഉദ്യോഗസ്ഥൻ തയ്യാറായില്ല.
എബിന്റെ ദേഹത്തു 53 സെമി നീളമുള്ള മുറിവ് എങ്ങിനെ സംഭവിച്ചുവെന്ന ചോദ്യം ആദ്യം ഉന്നയിച്ചത് പോസ്റ്റ്മോർട്ടം പരിശോധന നടത്തിയ പോലീസ് സർജനാണ്. മുറിവ് അവയവദാനത്തിന്റെ ഭാഗമായുണ്ടായതാണെന്ന് വിശദീകരണം ലഭിച്ചപ്പോൾ ഇക്കാര്യം പോസ്റ്റ്മോർട്ടം ചെയ്യേണ്ട ഡോക്ടറെ അറിയിക്കാതിരുന്നത് എന്ത് കൊണ്ടെന്ന ചോദ്യവും പോലീസ് സർജൻ ഉന്നയിച്ചിരുന്നു. കൂടാതെ അവയവങ്ങൾ നീക്കം ചെയ്തപ്പോൾ എബിന്റെ ഹൃദയത്തിനും മുറിവേറ്റിരുന്നു. പോലീസ് സർജന്റെ മൊഴിയുടെ അടിസ്ഥാനത്തിലാണ് രണ്ടാമത് അന്വേഷണം നടത്തിയ ഉദ്യോഗസ്ഥൻ എബിനെ ചികിത്സിച്ച ഡോ. ബി വേണുഗോപാലിനെതിരെ മൃതദേഹത്തോട് അനാദരവ് കാണിച്ചതിന് കേസ് എടുക്കണമെന്ന റിപ്പോർട്ട് സമർപ്പിച്ചത്.
