എല്ലാ ഉപയോക്താക്കൾക്കുമായി ബ്രോഡ്കാസ്റ്റ് ചാനൽ ഫീച്ചർ വിപുലീകരിച്ച് ഇൻസ്റ്റഗ്രാം. കഴിഞ്ഞ ഫെബ്രുവരിയിലാണ് ഈ സംവിധാനം ഇൻസ്റ്റഗ്രാം അവതരിപ്പിച്ചത്. പുതിയ അപ്ഡേഷനിലൂടെ ഈ ഫീച്ചർ എല്ലാവർക്കും ലഭ്യമാകുകയാണ് ഇൻസ്റ്റഗ്രാം. ഫോട്ടോകളും വീഡിയോകളും ഫോളോവേഴ്സിന് നേരിട്ട് അയയ്ക്കാൻ അനുവദിക്കുന്ന ഫീച്ചറാണ് ബ്രോഡ്കാസ്റ്റ് ഫീച്ചറിന്റെ പ്രധാന സവിശേഷത.
ക്രിയേറ്റർ വിഭാഗത്തിൽ പെട്ടിട്ടുള്ള ഇൻസ്റ്റഗ്രാം അക്കൗണ്ട് ഉടമകൾക്കാണ് പുതിയ ഫീച്ചർ ഉപയോഗിക്കാൻ സാധിക്കുക. വൺ-ടു-മെനി സന്ദേശമയയ്ക്കൽ ടൂളായി ബ്രോഡ്കാസ്റ്റ് ചാനലുകൾ പ്രധാനമായി ഉപയോഗിക്കാൻ കഴിയും. ഇതിലൂടെ സ്രഷ്ടാക്കൾക്ക് ടെക്സ്റ്റ്, ഇമേജ്, വീഡിയോ അപ്ഡേറ്റുകൾ എന്നിവ കൂടുതൽ പേരിലെത്തതിക്കാൻ കഴിയും. സ്രഷ്ടാക്കൾക്ക് മാത്രമേ ചാനലുകളിൽ ഉള്ളടക്കം അയയ്ക്കാൻ കഴിയൂ. കൂടാതെ കമന്റ്, ഫോളോവേഴ്സ് എന്നീ കാര്യങ്ങളിൽ നിയന്ത്രണമേർപ്പെടുത്താൻ ക്രീയേറ്റർമാർക്ക് സാധിക്കും.
ഒരു ക്രിയേറ്റർക്ക് ഇൻസ്റ്റഗ്രാമിൽ ബ്രോഡ്കാസ്റ്റ് അവകാശം ലഭിച്ചാൽ അയാളുടെ ഫോളോവർമാർക്ക് ഒരു സന്ദേശം ലഭിക്കും. ചാനലിൽ ജോയിൻ ചെയ്യാൻ ആവശ്യപ്പെട്ടായിരിക്കും മെസെജ്. ഈ സന്ദേശം ഇൻസ്റ്റഗ്രാം ഇൻബോക്സിൽ നേരിട്ട് അയയ്ക്കാം. ഫോളോവർമാർക്ക് പ്രോഗ്രാമുകളെക്കുറിച്ചുള്ള നോട്ടിഫിക്കേഷൻസും ലഭിക്കും.
തങ്ങൾ ഫോളോ ചെയ്യുന്ന ബ്രോഡ്കാസ്റ്റ് ചാനലിൽ നിന്ന് ഇഷ്ടമുള്ളപ്പോൾ പുറത്തുവരികയോ, അതിൽ നിന്നുള്ള കണ്ടെന്റ് കാണുകയോ, കാണാതിരിക്കുകയോ ചെയ്യാം. ഓരോ ബ്രോഡ്കാസ്റ്റ് ചാനലിൽ നിന്നുമുള്ള നോട്ടിഫിക്കേഷൻ വേണ്ടന്നുവയ്ക്കാനും സാധിക്കും. ഇതിനുള്ള ക്രമീകരണം പ്രൊഫൈലിൽ സെറ്റിങ്സിൽ നടത്താം.
ക്രിയേറ്റർക്ക് മറ്റ് ക്രിയേറ്റർമാരെ അല്ലെങ്കിൽ ആരാധകരെ പോലും അവരുടെ ചാനലുകളിൽ പങ്കെടുക്കാൻ ക്ഷണിക്കാൻ കഴിയുന്ന ”കൊളാബറേറ്റർ” സവിശേഷതയും ഇൻസ്റ്റഗ്രാം പ്രഖ്യാപിച്ചിട്ടുണ്ട്.
