മൃഗസ്നേഹികളെ സംബന്ധിച്ച് വളർത്തുമൃഗങ്ങൾ അവരുടെ വീട്ടിലെ ഒരംഗം തന്നെയാണ്. മൃഗങ്ങൾക്കും മനുഷ്യർക്കുമിടയിൽ ഉടലെടുക്കുന്ന ആത്മബന്ധമെന്നത് അനുഭവിച്ചറിയേണ്ട ഒന്നാണ്. അത്തരത്തിൽ ഒരു ചിത്രമാണ് സമൂഹമാദ്ധ്യമങ്ങളിൽ വൈറലായിരിക്കുന്നത്. വീട്ടിലെ ഏറ്റവും പ്രിയപ്പെട്ട ഒരംഗം വിട പറഞ്ഞതിന്റെ സങ്കടം പങ്കുവെച്ചിരിക്കുകയാണ് നടി പാർവതി ജയറാം. വർഷങ്ങളോളം വീടിന് കാവലായി വീട്ടുകാരുടെ പ്രിയപ്പെട്ടവനായി ജീവിച്ച വളർത്തുനായ മെസ്സിമ്മയുടെ വിയോഗമാണ് പാർവതിയെ ദുഃഖത്തിലാഴ്ത്തിയിരിക്കുന്നത്.
‘വാക്കുകൾ എന്നെ പരാജയപ്പെടുത്തുന്നു. 40 ദിവസം പ്രായമുള്ള കുഞ്ഞായാണ് നീ എന്റെ ജീവിതത്തിലേക്ക് കടന്നു വന്നത്. നിന്റെ കുറുമ്പും ശാഠ്യങ്ങളും കൂട്ടുമെല്ലാം എനിയ്ക്ക് നഷ്ടമായി. നിന്നെ എന്റെ ഇളയ മകനായി തന്ന് ദൈവം എന്നെ അനുഗ്രഹിച്ചു. നിന്റെ അഭാവം ഇതെങ്ങനെ തരണം ചെയ്യുമെന്ന് എനിക്കറിയില്ല… നീയില്ലാതെ എന്റെ വീട് ഒരിക്കലും പഴയതുപോലെയാകില്ല. നീ നക്ഷത്രങ്ങളിൽ ഏറ്റവും തിളക്കമുള്ളവനായിരിക്കട്ടെ. നീ എവിടെയായിരുന്നാലും സന്തോഷവാനും കുറുമ്പനുമായിരിക്കുക. എന്റെ മെസ്സിമ്മ സമാധാനത്തോടെ വിശ്രമിക്കൂ. അമ്മയുടെയും അപ്പയുടെയും കണ്ണന്റെയും ചക്കിയുടെയും ഒത്തിരി ചുംബനങ്ങൾ’ -പാർവതി കുറിച്ചു.
മെസ്സിയ്ക്ക് ഒപ്പമുള്ള കുടുംബാംഗങ്ങളുടെ ചിത്രങ്ങളും താരം പങ്കുവെച്ചിട്ടുണ്ട്. മലയാളികളുടെ പ്രിയപ്പെട്ട താരകുടുംബമാണ് ജയറാമിന്റേത്. പാർവതിയും മക്കളായ കാളിദാസനും മാളവികയുമൊക്കെ ആരാധകർക്ക് ഏറെ പ്രിയങ്കരാണ്. ജയറാമിന്റെ ആനപ്രേമം എല്ലായിപ്പോഴും സാമൂഹ്യമാദ്ധ്യമങ്ങളിൽ ചർച്ച ചെയ്യപ്പെടാറുള്ളതാണ്.
Comments