ഗർഭിണിയായ കാമുകിയോട് മാപ്പ് പറഞ്ഞ് ഫുട്ബോൾ താരം നെയ്മർ ജൂനിയർ. താരം വഞ്ചിച്ചുവെന്ന ആരോപണം പുറത്തുവന്നതിന് പിന്നാലെയാണ് കാമുകി ബ്രൂണ ബിയാൻകാർഡിയോട് പരസ്യമായി നെയ്മർ ക്ഷമാപണം നടത്തിയത്. ഇൻസ്റ്റാഗ്രാമിലൂടെയായിരുന്നു താരത്തിന്റെ പ്രതികരണം. മോഡൽ കൂടിയായ ബ്രൂണ ഗർഭിണിയാണെന്നുള്ള വിവരം വലിയ വാർത്തയായിരുന്നു. പുതിയ അതിഥി വരുന്നതോടെ ഇരുവർക്കും ഇടയിലുള്ള പ്രശ്നങ്ങളുടെ മഞ്ഞുരുകുമെന്ന് ആരാധകർ പ്രതീക്ഷിക്കുന്നു.
തങ്ങൾക്കിടയിലെ പ്രശ്നം പരിഹരിക്കാൻ മാപ്പ് പറയുന്നതുകൊണ്ട് കഴിയുമോ എന്ന് അറിയില്ലെങ്കിലും അതിനുവേണ്ടി ശ്രമിക്കാൻ താൻ തയ്യാറാണെന്നാണ് ബ്രസീലിയൻ ഫുട്ബോൾ താരം ഇൻസ്റ്റാഗ്രാമിൽ കുറിച്ചത്. കാമുകിയ്ക്കൊപ്പമുള്ള ജീവിതം മുന്നോട്ടുകൊണ്ടുപോകാനാണ് തന്റെ ആഗ്രഹമെന്നും നെയ്മർ പറയുന്നു. ബിയാൻകാർഡിയോടും കുടുംബാംഗങ്ങളോടും ക്ഷമ ചോദിച്ചുകൊണ്ടാണ് നെയ്മറിന്റെ കുറിപ്പ്.
‘ഞാൻ നിന്നോടും നിന്റെ കുടുംബത്തോടും മാപ്പ് പറയുന്നു. നമ്മുക്ക് മുന്നോട്ടു പോകാൻ കഴിയുമോ എന്ന് എനിക്കറിയില്ല. പക്ഷേ ഇന്ന്, ഞാൻ നിനക്ക് ഉറപ്പ് നൽകുന്നു. ഒരുമിച്ച് പോകുന്നതിന് വേണ്ടി ഞാൻ പരിശ്രമിക്കാൻ തയ്യാറാണ്. നമ്മുടെ ലക്ഷ്യം വിജയിക്കും. നമ്മുടെ കുഞ്ഞിനോടുള്ള സ്നേഹം വിജയിക്കും. പരസ്പരമുള്ള സ്നേഹം നമ്മളെ കൂടുതൽ ശക്തരാക്കും. നീതീകരിക്കാനാവാത്തതിനെ ന്യായീകരിക്കാൻ എനിക്ക് താൽപ്പര്യമില്ല. എന്റെയും കുഞ്ഞിന്റെയും ജീവിതത്തിൽ ബ്രു (കാമുകിയെ സ്നേഹപൂർവ്വം വിളിക്കുന്നത്) ആവശ്യമാണ്. നീയില്ലാതെ ജീവിതം സങ്കൽപ്പിക്കാൻ കഴിയില്ല’- നെയ്മർ ഇൻസ്റ്റാഗ്രാമിൽ കുറിച്ചു.
Comments