തൃശൂർ: കൊതുകുജന്യ രോഗങ്ങളായ ഡെങ്കിപ്പനി, മലമ്പനി തുടങ്ങിയവയുടെ പ്രതിരോധ പ്രവർത്തനങ്ങൾക്കായി തൃശൂർ ജില്ലയിൽ വെക്റ്റർ കൺട്രോൾ യൂണിറ്റിന് കീഴിൽ 90 ദിവസത്തേയ്ക്ക് ഫീൽഡ് വർക്കർ ജീവനക്കാരെ തിരഞ്ഞെടുക്കുന്നു. പൊതുസ്ഥല ശുചീകരണം, കൊതുകിന്റെ ഉറവിടനശീകരണം, കൂത്താടി നശീകരണ സ്പ്രേയിംഗ്, ഫോഗിംഗ്, ഇൻഡോർ സ്പെയ്സ് സ്പ്രേയിംഗ് (ഐ.എസ്.എസ്,) ഇൻഡോർ റസിഡ്യൂവൽ സ്പ്രേയിംഗ് (ഐ.ആർ.എസ്) മുതലായവ നടപ്പാക്കുന്നതിനായാണ് നിയമനം. ഏഴാംക്ലാസ്സ് മിനിമം വിദ്യാഭ്യാസ യോഗ്യതയുള്ള, 18നും 55നും ഇടയിൽ പ്രായമുള്ള വ്യക്തികളിൽ നിന്നും നിയമനത്തിന് അപേക്ഷ ക്ഷണിച്ചു.
പ്രതിദിനം 675 രൂപ നിരക്കിൽ പൂർണ്ണമായും ദിവസ വേതനാടിസ്ഥാനത്തിലാണ് നിയമനം. തിരഞ്ഞെടുക്കപ്പെടുന്നവർക്ക് ചാവക്കാട്, കുന്നംകുളം, തൃശൂർ, ചാലക്കുടി, ഇരിഞ്ഞാലക്കുട, കൊടുങ്ങല്ലൂർ എന്നിവിടങ്ങളിലുള്ള വെക്റ്റർ കൺട്രോൾ യൂണിറ്റുകളിൽ ആയിരിക്കും നിയമനം. താൽപര്യമുള്ളവർ ജൂൺ 27ന് തൃശൂർ ജില്ലാ മെഡിക്കൽ ഓഫീസ് (ആരോഗ്യം) കോൺഫറൻസ് ഹാളിൽ നടത്തുന്ന വാക്ക്-ഇൻ ഇന്റവ്യൂവിൽ രാവിലെ 11 മണിക്ക് മുൻപായി നേരിട്ട് ഹാജരാകേണ്ടതാണ്. പ്രായം, വിദ്യാഭ്യാസ യോഗ്യത എന്നിവ തെളിയിക്കുന്ന രേഖകൾ, തിരിച്ചറിയൽ കാർഡ് / ആധാർ കാർഡ്, ബാങ്ക് പാസ്സ് ബുക്കിന്റെ പകർപ്പ് എന്നിവ കൊണ്ടുവരണം.
