സൂപ്പർ താരങ്ങളെ താരങ്ങളാക്കിയവരെ പരിചയപ്പെടുന്ന സീരീസ് ആണ് ഭാവന സ്റ്റുഡിയോസിന്റെ ‘ദ ഫാനറ്റിക്’. താരങ്ങളെപ്പറ്റിയുള്ള നിരവധി വീഡിയോ നാം കാണാറുണ്ട്. താരങ്ങളെ താരങ്ങളാക്കിയ ആരാധകരെപ്പറ്റിയുള്ള വീഡിയോ വ്യത്യസ്തമല്ലേ. ഭാവന സ്റ്റുഡിയോസിന്റെ ‘ദ ഫാനറ്റിക്’ അത്തരത്തിലൊരു പരിപാടിയാണ്. മലയാളികൾക്ക് സൂപ്പർ സ്റ്റാറുകൾ മൂന്നാണ്. മമ്മൂട്ടി, മോഹൻലാൽ, സുരേഷ് ഗോപി. മലയാളത്തിന്റെ ത്രിമൂർത്തികൾ. ഇവരുടെ ഫാൻ അല്ലത്താവരായ മലയാളികളുണ്ടാവില്ല. മോഹൻലാലിന്റെയും മമ്മൂട്ടിയുടെയും ആരാധകരെ പരിചയപ്പെടുത്തിയതോടെ സുരേഷ് ഗോപി ഫാനിനായുള്ള കാത്തിരിപ്പിലായിരുന്നു മലയാളികൾ. ഇപ്പോഴിതാ, സുരേഷ് ഗോപിയുടെ കടുത്ത ഒരു ആരാധികയെ പ്രേക്ഷകർക്ക് പരിചയപ്പെടുത്തിയിരിക്കുകയാണ് ‘ദ ഫാനറ്റിക്’.
വിണ്ണിൽ നിന്നും മണ്ണിലേയ്ക്ക് ഇറങ്ങി വന്ന താരമെന്നാണ് മലയാളികൾ സുരേഷ് ഗോപിയെ വിശേഷിപ്പിക്കുന്നത്. മലയാളത്തിന്റെ ഫയർ ബ്രാൻഡ് ആയ സുരേഷ് ഗോപിക്ക് ആരാധകരേറെയാണ്. തീപ്പൊരി ഡയലോഗുകൾ കൊണ്ടും ആക്ഷൻ രംഗങ്ങൾ കൊണ്ടും മലയാളികളെ രോമാഞ്ചം കൊള്ളിക്കുക മാത്രമല്ല, ജീവകാരുണ്യ പ്രവർത്തനങ്ങളിലൂടെയും മനുഷ്യത്വം കൊണ്ടും ജനങ്ങളുടെ ഹൃദയം തൊട്ട താരം കൂടിയാണ് അദ്ദേഹം. തന്നെ കാണാൻ ആഗ്രഹിക്കുന്നവരെ സുരേഷ് ഗോപി നിരാശരാക്കാറില്ല. അത്തരത്തിൽ സുരേഷ് ഗോപിയെ ഒന്നു കാണുക എന്ന ആഗ്രഹവുമായി വർഷങ്ങളോളം നടന്ന ചന്ദ്രിക എന്ന ആരാധികയെ പരിചയപ്പെടുത്തുകയാണ് ദ ഫാനറ്റിക്കിന്റെ ആറാമത്തെ എപ്പിസോഡിൽ.
