തീവ്രവാദ ഫണ്ടിംഗ് നടക്കുന്നുവെന്ന് സംശയത്തെ തുടർന്ന് കാശ്മീരിലെ വിവിധയിടങ്ങളിൽ എൻഐഎയുടെ വ്യാപക റെയിഡ്. പുൽവാമ,ഷോപ്പിയാൻ,കുൽഗാം തുടങ്ങിയ ജില്ലകളിലാണ് രാവിലെ മുതൽ റെയിഡ് ആരംഭിച്ചത്.ബന്ദിപൂരിലും റെയിഡ് നടക്കുന്നതായാണ് വിവരം. തീവ്രവാദികളെ ലോജിസ്റ്റിക് പിന്തുണയോടെ സഹായിക്കുന്ന ഓവർ ഗ്രൗണ്ട് വർക്കർമാരുടെ (ഒജിഡബ്ല്യു) ശൃംഖലയെക്കുറിച്ചുള്ള അന്വേഷണവുമായി ബന്ധപ്പെട്ടാണ് ദേശീയ അന്വേഷണ ഏജൻസി ജമ്മു കശ്മീരിലുടനീളം വിവിധ ഇടങ്ങളിലായി റെയ്ഡ് നടത്തുന്നത്.
ഇതിനിടെ തെക്കൻ കശ്മീരിലെ കുൽഗാം, പുൽവാമ, ഷോപ്പിയാൻ എന്നിവിടങ്ങളിലെ നിരവധി സ്ഥലങ്ങളിൽ അന്വേഷണ ഏജൻസി തിരച്ചിൽ നടത്തി. എൻഐഎ സംഘവും പോലീസും സെൻട്രൽ റിസർവ് പോലീസ് സേനയും (സിആർപിഎഫ്) വടക്കൻ കശ്മീരിലെ ബന്ദിപ്പോര ജില്ലയിലും പരിശോധന നടത്തുന്നുണ്ട്. കഴിഞ്ഞ മാസവും തീവ്രവാദ ബന്ധമുള്ള കേസുകളുമായി ബന്ധപ്പെട്ട് ജമ്മു കശ്മീരിലെ ഒന്നിലധികം സ്ഥലങ്ങളിൽ എൻഐഎ റെയ്ഡ് നടത്തിയിരുന്നു.
ശ്രീനഗർ, ബുഡ്ഗാം, പുൽവാമ, ഷോപ്പിയാൻ, അവന്തിപോറ, അനന്ത്നാഗ്, ഹന്ദ്വാര, കുപ്വാര, പൂഞ്ച് ജില്ലകളിലെ നിരോധിത തീവ്രവാദ സംഘടനകളുടെ ഗൂഢാലോചനയിൽ ഉൾപ്പെട്ട ജമാഅത്തെ ഇസ്ലാമി (ജെഐ), ഒജിഡബ്ല്യു എന്നിവരുമായി ബന്ധപ്പെട്ട സ്ഥലങ്ങളിലും അവരുടെ അനുബന്ധ സ്ഥാപനങ്ങളിലുമായി വ്യാപകമായ തിരച്ചിൽ നടത്തിയിരുന്നു.
Comments