സ്ലീപ്പർ ക്ലാസിൽ ടിക്കറ്റ് ബുക്ക് ചെയ്ത് എസി കോച്ചിൽ യാത്ര ചെയ്താലോ? ബുക്ക് ചെയ്ത ക്ലാസിൽ നിന്ന് തൊട്ടടുത്ത ക്ലാസിലേക്ക് സൗജന്യമായി സീറ്റ് അനുവദിക്കുന്ന ഓട്ടോ അപ്ഗ്രഡേഷൻ സംവിധാനവുമായി ഇന്ത്യൻ റെയിൽവേ. ടിക്കറ്റ് ബുക്ക് ചെയ്യുന്ന റൂട്ടിൽ തിരക്കില്ലെങ്കിൽ സ്ലീപ്പർ ടിക്കറ്റെടുത്തവർക്ക് എസിയിൽ യാത്ര ചെയ്യാവുന്നതാണ്. ടിക്കറ്റ് നിരക്കിൽ മാറ്റമില്ലാതെ യാത്രക്കാർക്ക് എസി ക്ലാസിൽ യാത്ര ഉറപ്പ് നൽകുകയാണ് റെയിൽവേ.
സീറ്റുകളുടെ ലഭ്യത പരമാവധി ഉറപ്പുവരുത്താനാണ് റെയിൽവേ ഓട്ടോ അപ്ഗ്രഡേഷൻ സംവിധാനം അവതരിപ്പിച്ചത്. മെയിൻ അല്ലെങ്കിൽ എക്സ്പ്രസ് ട്രെയിനുകളിൽ ഉയർന്ന ക്ലാസിൽ ടിക്കറ്റ് ഒഴിവുണ്ടെങ്കിൽ തൊട്ടുതാഴെയുള്ള ക്ലാസിലെ യാത്രക്കാർക്ക് ടിക്കറ്റ് അപ്ഗ്രേഡ് ചെയ്ത് നൽകും. അധികചാർജ് ഈടാക്കുന്നില്ലെന്നതാണ് ഈ സംവിധാനത്തിന്റെ ഗുണം. ടിക്കറ്റ് ബുക്ക് ചെയ്യുമ്പോൾ ആപ്പിൽ ‘ഓട്ടോ അപ്ഗ്രഡേഷൻ’ എന്ന ഭാഗത്ത് ക്ലിക്ക് ചെയ്ത് ഈ സൗകര്യം ഉപയോഗിക്കാവുന്നതാണ്. ഓപ്ഷൻ തിരഞ്ഞെടുത്തില്ലെങ്കിലും ഇത് ലഭ്യമാകുമെന്ന് റെയിൽവേ അറിയിച്ചിട്ടുണ്ട്. എന്നാൽ കൺസഷൻ നിരക്കിൽ ടിക്കറ്റ് എടുത്തവർക്കോ റെയിൽവേ പാസ് ഉള്ളവർക്കോ ബൾക്ക് ബുക്കിംഗ് നടത്തിയവർക്കോ ടിക്കറ്റ് ഓട്ടോ അപ്ഗ്രഡേഷൻ ലഭിക്കില്ല.
ഓട്ടോ അപ്ഗ്രേഡേഷൻ പ്രക്രിയ തൊട്ടടുത്ത ലെവലിലേക്ക് മാത്രമാണ് ലഭിക്കുക. സ്ലീപ്പർ ക്ലാസ് ബെർത്ത് ടിക്കറ്റ് ഉണ്ടെങ്കിൽ അത് എസി 3 ടയറിലേക്ക് അപ്ഗ്രേഡ് ചെയ്യപ്പെടും. 3 ടയർ എസി ടിക്കറ്റ് എസി 2 ടയറായും എസി 2ടയർ ടിക്കറ്റുള്ളവർക്ക് ഫസ്റ്റ് എസി ടിക്കറ്റും അപ്ഗ്രേഡ് ചെയ്ത് യാത്രക്കാർക്ക് ലഭ്യമാകും.പാസഞ്ചർ റിസർവേഷൻ സിസ്റ്റം (പിആർഎസ്) വഴിയാണ് അപ്ഗ്രേഡേഷൻ നടക്കുന്നത്.അതുകൊണ്ട് തന്നെ ട്രെയിനിലെ ടിക്കറ്റ് പരിശോധകർക്ക് ഓട്ടോ അപ്ഗ്രഡേഷൻ നൽകാൻ സാധിക്കില്ല. ഒരു പിഎൻആർ നമ്പറിലെ എല്ലാ യാത്രക്കാരെയും ഒന്നിച്ചാണ് അപ്ഗ്രേഡ് ചെയ്യുന്നത്. ആവശ്യത്തിന് ബർത്തില്ലെങ്കിൽ ആർക്കും അപ്ഗ്രേഡ് ലഭിക്കുകയില്ല.
