വാഷിംഗ്ടൺ : കണ്ടാൽ കണ്ണിൽ പോലും പിടിയ്ക്കാത്ത ഒരു ബാഗിന് അമേരിക്കയിൽ നടന്ന ലേലത്തിൽ ലഭിച്ചത് ലക്ഷങ്ങൾ. ഉപ്പുതരിയേക്കാൾ കുഞ്ഞനായ ബാഗ് ഒരു ലേലത്തിൽ വിറ്റുപോയത് 63,000 ഡോളറിന് (അതായത് 51 ലക്ഷം രൂപ). ഉപ്പ് തരിയേക്കാൾ ചെറുതും ഒരു സൂചിയുടെ ദ്വാരത്തിലൂടെ കടന്നുപോകുന്നതുമായ ബാഗ് കാണാൻ ഒരു മൈക്രോസ്കോപ്പ് തന്നെ വേണം.
ബ്രൂക്ലിൻ ആസ്ഥാനമായുള്ള അസ്ഥാനമായുള്ള ആർട്ട് അന്റേ അഡ്വർടൈസിംഗ് കൂട്ടായ്മയായ എംഎസ്സിഎച്ച്എഫ് ആണ് ബാഗ് നിർമ്മിച്ചത്. ഇൻസ്റ്റഗ്രാമിലൂടെ പങ്കുവെച്ച ബാഗിന്റെ ചിത്രങ്ങൾ ഇതിനോടകം തന്നെ സമൂഹമാദ്ധ്യമങ്ങളിൽ വൈറലായിരുന്നു. എംഎസ്സിഎച്ചഎഫ് ലൂയി വിറ്റൺ ഡിസൈനിനെ അടിസ്ഥാനമാക്കിയായിരുന്നു ബാഗിന്റെ നിർമ്മാണം. ഫ്ളൂറസെന്റ് മഞ്ഞയും പച്ചയും കലർന്ന ഈ മൈക്രോസ്കോപ്പ് ബാഗിന് ലഭിച്ചത് വൻ ഡിമാൻഡായിരുന്നു.
ഇക്കഴിഞ്ഞ ജൂൺ 27-ന് ഓൺലൈൻ ലേല സ്ഥാപനമായ ജൂപ്പിറ്റർ ആണ് ലേലം സംഘടിപ്പിച്ചത്. രണ്ട് ഫോട്ടോ പോളിമറൈസേഷൻ ഉപയോഗിച്ചാണ് ബാഗിന്റെ നിർമ്മാണമെന്ന് റിപ്പോർട്ടുകൾ പുറത്തു വന്നിരുന്നു. 657ഃ222ഃ700 മൈക്രോമീറ്ററാണ് ബാഗിന്റെ നീളവും വീതിയും ഉയരവും.
‘വലിയ ഹാൻഡ്ബാഗുകളും സാധാരണ ഹാൻഡ്ബാഗുകളും ചെറിയ ഹാൻഡ്ബാഗുകളും ഉണ്ട്. എന്നാൽ ഇത് ബാഗ് മിനിയേച്ചറൈസേഷന്റെ അവസാന വാക്കാണ്’ ഇതെന്ന് എംഎസ്സിഎച്ച്എഫ് പറയുന്നു. ഉത്പന്നം വാങ്ങുന്നയാൾക്ക് ഇത് കാണാൻ കഴിയുന്ന തരത്തിൽ ഡിജിറ്റൽ ഡിസ്പ്ലേയുള്ള മൈക്രോസ്കോപ്പ് സഹിതമാണ് വിറ്റിരിക്കുന്നത്. 2016-ൽ സ്ഥാപിതമായ എംഎസ്സിഎച്ച്എഫ് ഇത്തരത്തിൽ വിചിത്രമായ ലേലങ്ങൾക്ക് പേരുകേട്ട സംഘടനയാണ്. മനുഷ്യരക്തമുള്ള ഷൂ, ഭീമൻ റബർ ബൂട്സ്, വിശുദ്ധ ജലം സോളിൽ നിറച്ച സ്പോർട്സ് ഷൂ തുടങ്ങി വ്യത്യസ്തമാർന്ന ഉത്പന്നങ്ങൾ കൊണ്ട് മുൻപും വാർത്തയിൽ ഇടം നേടിയിരുന്നു.
