കേരളത്തിന്റെ സ്വന്തം വളളംകളി വിംബിൾഡണിലും പ്രശസ്തിയാർജ്ജിക്കുന്നു. ലോക ടെന്നീസിലെ ഏറ്റവും പ്രധാനപ്പെട്ട ടൂർണമെന്റായ വിംബിൾഡണ്ണിന്റെ ഫേസ്ബുക്ക് പേജിലാണ് കേരളത്തിന്റെ സ്വന്തം വളളംകളിയുടെ പോസ്റ്റർ ഫീച്ചർ ചെയ്തിരിക്കുന്നത്.
കേരളത്തിലെ തെങ്ങിൻ തോപ്പിനോട് ചേർന്ന് നിൽക്കുന്ന കായലുകളിൽ പരമ്പരാഗത വള്ളങ്ങൾ തുഴയുന്ന മുൻനിര ടെന്നീസ് താരങ്ങളെയാണ് പോസ്റ്ററിൽ ഉൾപ്പെടുത്തിയിരിക്കുന്നത്. കേരളവും ലണ്ടനും കൈകോർക്കുന്ന ഇമോജിക്കൊപ്പം ‘വാർഷിക വള്ളംകളിക്ക് തയ്യാറാണ്! ആരാണ് 2023 വിംബിൾഡൺ ചാമ്പ്യൻഷിപ്പ് ഉയർത്തുക?’ എന്ന അടിക്കുറിപ്പും നൽകിയിരുന്നു.
കേരളത്തിന്റെ തനത് വള്ളംകളി അവതരിപ്പിക്കുന്ന ആദ്യത്തെ അന്താരാഷ്‌ട്ര ടൂർണമെന്റല്ല വിംബിൾഡൺ. അടുത്തിടെ, ചെൽസി എഫ്സി ആലപ്പുഴയിലെ കായലുകളിൽ ഒരു വെർച്വൽ ടൂർ നടത്തുകയും സംസ്ഥാനത്തിന്റെ പ്രകൃതി സൗന്ദര്യത്തെ പ്രശംസിക്കുകയും ചെയ്തിരുന്നു. കൂടാതെ മുൻനിര ഫുട്‌ബോൾ ക്ലബ്ബുകളും അവരുടെ സമൂഹമാദ്ധ്യമ അക്കൗണ്ടുകളിൽ കേരളത്തിന്റെ ഉത്സവങ്ങളെ പറ്റിയും ആഘോഷങ്ങളെ പറ്റിയും പരാമർശിച്ച് പോസ്റ്റിട്ടിരുന്നു.
