തുള്ളിതോരത്ത മഴയിൽ ഒരു കപ്പ് ചായയുമായി ബാൽക്കണിയിലോ വരാന്തയിലോ നിൽക്കാൻ ആഗ്രഹിക്കാത്തവർ ആരാണുള്ളതല്ലേ. അതൊരു വികാരവും ലഹരിയുമാണ് പലർക്കും. ആരോഗ്യകാര്യത്തിലും ഭക്ഷണകാര്യത്തിലും ഏറെ ശ്രദ്ധ വേണ്ട കാലമാണ് മഴക്കാലം. രോഗങ്ങളുടെ വലയിൽ പെടാനുള്ള സാദ്ധ്യതയേറെയാണ് മഴക്കാലത്ത്. ശരീരത്തിന്റെ പ്രതിരോധ ശേഷി വർദ്ധിപ്പിക്കുകയാണ് ഇതിനുള്ള പ്രതിവിധി. ഇതിനായി ചായയിൽ ചില സൂത്രപ്പണികൾ മതിയാകും.
മഴക്കാലത്ത് എല്ലാവരിലും കണ്ട് വരുന്നതാണ് ജലദോഷവും ചുമയും. ഇവയെ പ്രതിരോധിക്കുന്നതിനായി ചായയിൽ അൽപം ഏലയ്ക്ക ചേർക്കുന്നത് നല്ലതാണ്. ചായയ്ക്ക് ഗന്ധം നൽകുന്നതിന് പുറമേ രോഗപ്രതിരോധശേഷി വർദ്ധിപ്പിക്കുന്നതിനും ഏലയ്ക്ക നല്ലതാണ്. ഹൃദ്രോഗ സാദ്ധ്യത കുറയ്ക്കുന്നതിനും ശരീരഭാരം കുറയ്ക്കുന്നതിലും ഏലയ്ക്ക വലിയ പങ്ക് വഹിക്കുന്നു. രക്തസമ്മർദ്ദം കുറയ്ക്കുന്നതിനും വിഷാദരോഗത്തെ നേരിടാനും ഏലയ്ക്ക ചായ സഹായിക്കും. ആസ്തമ, ബ്രോങ്കൈറ്റിസ് തുടങ്ങിയ ശ്വാസകോശ സംബന്ധമായ പ്രശ്നങ്ങൾ തടയാനും മികച്ചതാണ് ഇത്.
പ്രതിരോധശേഷി വർദ്ധിപ്പിക്കുന്നതിൽ പ്രധാന പങ്ക് വഹിക്കുന്നയൊന്നാണ് ഇഞ്ചി. ദിവസവും ഇഞ്ചിയിട്ട് ചായ കുടിക്കുന്നത് രക്തസമ്മർദ്ദം കുറയ്ക്കാൻ കാരണമാകുന്നു. സ്ത്രീകൾ നേരിടുന്ന ആർത്തവ വേദനയ്ക്കും ഇഞ്ചിയ്ക്ക് പരിഹാരം കാണാൻ കഴിയും. ഇഞ്ചി ചായ കുടിക്കുന്നത് പതിവാക്കിയാൽ രോഗപ്രതിരോധശേഷി വർദ്ധിപ്പിക്കുന്നതിനും സമ്മർദ്ദം കുറയ്ക്കാനും കഴിയും. ദഹനപ്രക്രിയ സുഗമമാക്കാനും ഇഞ്ചി ചായ സഹായിക്കും. ചായയിൽ കഷ്ണങ്ങളാക്കിയോ ചതച്ചോ ഇഞ്ചി ചേർക്കാവുന്നതാണ്. അഞ്ച് മിനിറ്റോളം തിളപ്പിച്ച ശേഷം ചൂടോടെ ചായ കുടിക്കാവുന്നതാണ്.
ദിവസവും രാവിലെ കറുവപ്പട്ട ചേർത്ത ചായ കുടിക്കുന്നത് ശരീരത്തിന് പ്രതിരോധ ശേഷി നൽകുന്നു. ഇതുവഴി ബാക്ടീരിയൽ, ഫംഗൽ അണുബാധകളിൽ നിന്ന് ശരീരത്തെ സംരക്ഷിക്കുന്നു. മോണയുടെ ആരോഗ്യത്തിനും കറുവപ്പട്ട മികച്ചതാണ്. ആർത്തവവേദനയുടെ ഫലങ്ങൾ കുറയ്ക്കാനും ഇത് സഹായകമാണ്. പിസിഒഎസ് ലക്ഷണങ്ങൾ ലഘൂകരിക്കാനും കറുവപ്പട്ട ചായ ഗുണം ചെയ്യും.
എല്ലാ വീടുകളിലും സുലഭമായി ലഭിക്കുന്ന ഒന്നാണ് തുളസി. തുളസിയിട്ട ചായ മഴക്കാലത്ത് വളരെ നല്ലതാണ്. പ്രതിരോധശേഷി വർദ്ധിപ്പിക്കാൻ കഴിവുള്ള തുളസിയെ ചായയിൽ ഉൾപ്പെടുത്തുന്നത് വഴി നിരവധി ഗുണങ്ങളാണ് ലഭിക്കുക. ക്യാൻസറിനെ പോലും പ്രതിരോധിക്കാനുള്ള കഴിവ് തുളസിയ്ക്കുണ്ടെന്ന് പഠനങ്ങൾ പറയുന്നു. ശരീരത്തിൽ സമ്മർദ്ദ ഹോർമോണായ കോർട്ടിസോളിന്റെ അളവ് സാധാരണനിലയിൽ നിലനിർത്താൻ തുളസിയ്ക്ക് കഴിയുന്നു. രക്തചംക്രമണം ക്രമീകരിക്കുവാനും ചർമ്മ സംരക്ഷണത്തിനും മികച്ചതാണ് തുളസിയില. ശരീരത്തിന്റെ തിളക്കം വർദ്ധിപ്പിക്കാൻ ആഗ്രഹിക്കുന്നവർക്ക് ദിവസവും തുളസിയില ചായ ശീലമാക്കാവുന്നതാണ്. സൈനസൈറ്റിസ്, അലർജി, ജലദോഷ്, മൈഗ്രെയ്ൻ എന്നിവ മൂലമുണ്ടാകുന്ന തലവേദനയോട് വിട പറയാനും തുളസിയിലയ്ക്കാകും. അതുകൊണ്ട് തുളസിയില ചായ ശീലമാക്കുന്നത് ആരോഗ്യപരമായി നിരവധി ഗുണങ്ങളാണ് നൽകുക.
Comments