സമയത്തിന്റെ ഗതി എല്ലായ്‌പ്പോഴും ഒരേ രീതിയിൽ ആയിരിക്കുമോ എന്ന് ഒരിക്കലെങ്കിലും ചിന്തിക്കാത്തവർ ചുരുക്കമായിരിക്കും. സമയത്തിന്റെ വേഗത കൂട്ടുവാനും കുറയ്‌ക്കുവാനും സാധിക്കുമോ? ഇക്കാര്യം വളരെ വിചിത്രമായി തോന്നാമെങ്കിലും ഇത്തരത്തിൽ ഒരു പഠനമാണ് ഇപ്പോൾ ശ്രദ്ധേയമാകുന്നത്. പ്രപഞ്ചത്തിന്റെ പ്രാരംഭ ഘട്ടത്തിൽ സമയം കുറച്ചു കൂടി ഇഴഞ്ഞായിരുന്നു നീങ്ങിയിരുന്നതെന്നാണ് പഠനം.
പ്രപഞ്ചത്തിന് വെറും നൂറ് കോടി വർഷം മാത്രം പ്രായമുണ്ടായിരുന്ന കാലത്ത് സമയം നീങ്ങിയിരുന്നത് ഇന്നുള്ളതിനേക്കാൾ അഞ്ച് മടങ്ങ് കുറഞ്ഞ വേഗതയിൽ ആയിരുന്നുവെന്നാണ് പഠനത്തിൽ സൂചിപ്പിക്കുന്നത്. നേച്ചർ മാസികയിൽ പ്രസിദ്ധീകരിച്ച ഒരു പഠനത്തിലാണ് ഇക്കാര്യം പരാമർശിച്ചിരിക്കുന്നത്. മഹാവിസ്‌ഫോടനത്തിന് ശേഷം രൂപം കൊണ്ട പ്രപഞ്ചത്തിൽ അതിന്റെ പ്രാരംഭ കാലത്ത് വസ്തുക്കൾ ചലിച്ചിരുന്നത് സ്ലോ മോഷനിൽ ആയിരുന്നുവെന്നാണ് പഠനത്തിൽ വിശദീകരിച്ചിരിക്കുന്നത്.
ക്വാസാർസ് എന്ന ബ്ലാക്ക്‌ഹോളിനെ നിരീക്ഷിച്ചതിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് കണ്ടെത്തൽ നടത്തിയിരിക്കുന്നത്. നേച്ചർ മാസികയിൽ ജെറായിന്റ് എഫ് ലെവിസും ബ്രെൻഡൺ ജെ ബ്രൂവറും ചേർന്ന് തയാറാക്കി പ്രസിദ്ധീകരിച്ച പഠനത്തിലാണ് ഈ സുപ്രധാന വിവരങ്ങളെക്കുറിച്ച് പരാമർശിച്ചിരിക്കുന്നത്. സൂപ്പർ നോവകളെ കോസ്മിക് ക്ലോക്കുകളായി ഉപയോഗിച്ചാണ് പ്രപഞ്ചത്തിൽ സമയത്തിന്റെ വേഗതയുടെ ഏറ്റക്കുറിച്ചിലുകളെക്കുറിച്ച് പഠനങ്ങൾ നടത്തിയിരിക്കുന്നത്. പ്രപഞ്ചത്തിന് ഇപ്പോഴുള്ളതിന്റെ പകുതി വയസുണ്ടായിരുന്നപ്പോൾ സമയം നീങ്ങിയിരുന്നത് ഇപ്പോഴുള്ളതിന്റെ രണ്ട് മടങ്ങ് കുറഞ്ഞ വേഗതയിലായിരുന്നുവെന്ന് മുൻപ് പുറത്തുവന്ന പഠനങ്ങളിലും പരാമർശിച്ചിരുന്നു.
എത് രീതിയിലാണ് സമയത്തിന്റെ ഗതിവേഗം കൂടുകയും കുറയുകയും ചെയ്യുന്നതെന്ന കാര്യത്തിൽ ഇനിയും വ്യക്തത ലഭിക്കാൻ ഉണ്ടായിരിക്കാം. പ്രപഞ്ചം വികസിക്കുന്നതിന്റെ ഫലമായാണ് ഇതിലും മാറ്റങ്ങൾ സംഭവിക്കാറുള്ളത് എന്നാണ് കണ്ടെത്തൽ. പ്രപഞ്ചം വികസിക്കുന്നതോടെ വസ്തുക്കളിൽ നിന്ന് പ്രകാശം പ്രതിഫലിച്ചെത്തുന്ന സമയം വ്യത്യാസപ്പെടുന്നതിനാലണ് ഇത്തരത്തിൽ സംഭവിക്കുന്നത്. സ്‌പേസും സമയവും തമ്മിൽ വളരെയധികം ബന്ധമുണ്ടെന്ന് ഒരിക്കൽ കൂടി തെളിയിച്ചിരിക്കുകയാണ് പഠനം.
