തിരുവനന്തപുരം: അമേരിക്കയിലെ ടെന്നസി സ്റ്റേറ്റിൽവെച്ച് 43,000 അടി ഉയരത്തിൽ വിമാനത്തിൽ നിന്ന് സ്കൈ ഡൈവിംഗ് നടത്തി ലോക റെക്കോർഡ് കരസ്ഥമാക്കി മലയാളി യുവാവ്. കോഴിക്കോട് ബാലുശ്ശേരി പനായി സ്വദേശി ജിതിൻ വിജയൻ ആണ് ലോക റെക്കോർഡ് സ്വന്തമാക്കിയിരിക്കുന്നത്. ഈ കഴിഞ്ഞ ജൂലൈ ഒന്നിന് ഇന്ത്യൻ സമയം വൈകിട്ട് അഞ്ച് മണിയ്ക്കായിരുന്നു ജിതിൻ സ്കൈ ഡൈവിംഗ് നടത്തിയത്. 43,000 അടി ഉയരത്തിൽ നിന്നും ദേശീയ പതാക കയ്യിൽ കെട്ടി സ്കൈ ഡൈവിംഗ് നടത്തിയെന്ന നേട്ടവും ജിതിൻ സ്വന്തമാക്കിയിരുന്നു.
43,000 അടി ഉയരത്തിൽ നിന്ന് ഭൂമിയെ സ്പർശിക്കുന്നതിനായി ഏഴ് മിനിട്ടായിരുന്നു നാൽപ്പത്തിഒന്നുകാരനായ ജിതിൽ എടുത്ത സമയം. ഇതിൽ മൂന്ന് മിനിറ്റ് ഫ്രീ ഫാൾ ആയിരുന്നു. 5500 അടി ഉയരത്തിൽ നിന്നും പാരച്യൂട്ട് ഉയർത്തിയതിന് ശേഷം നാല് മിനിറ്റിലായിരുന്നു ലാൻഡ് ചെയ്തത്.
എറണാകുളത്ത് സ്ഥിതി ചെയ്യുന്ന എൻ ഡൈമെൻഷൻസ് സൊല്യൂഷൻസ് പ്രൈവറ്റ് ലിമിറ്റഡ് എന്ന ഐടി കമ്പനിയുടെ സിഇഒ ആണ് ഇദ്ദേഹം. കുട്ടിക്കാലം മുതൽ തന്നെ ജിതിന്റെയുള്ളിൽ പറക്കണമെന്ന ആഗ്രഹം ഉടലെടുത്തിരുന്നു. ഇത്തരത്തിൽ പറക്കുന്നതിനുള്ള മോഹം ഇദ്ദേഹത്തെ കൊണ്ടെത്തിച്ചത് പാരാഗ്ലൈഡിംഗിലാണ്. ഇതിന് ശേഷമായിരുന്നു സ്കൈ ഡൈവിംഗിലേയ്ക്കുള്ള ചുവടുമാറ്റം.
സ്പെയിനിൽ നിന്നാണ് എ ഗ്രേഡ് ലൈസൻസ് ജിതിൻ സ്വന്തമാക്കുന്നത്. ദുബായ്, അബുദാബി, യുകെ എന്നിവിടങ്ങളിലെ സ്കൈ ഡൈവിംഗ് സെന്ററുകളിൽ പരിശീലനം നടത്തി. പനായി സ്വദേശികളായ വിജയന്റെയും സത്യഭാമയുടെയും മകനാണ് ജിതിൻ.
