നിരവധി ടെലിവിഷൻ പരമ്പരകളിലൂടെയും സിനിമകളിലൂടെയും പ്രേക്ഷക ശ്രദ്ധ നേടിയ താരമാണ് കിരൺ അയ്യർ. സീരിലുകളിലൂടെയാണ് താരം കൂടുതൽ ശ്രദ്ധ നേടുന്നത്. ഇപ്പോഴിതാ താരം തന്റെ കരിയർ ആരംഭത്തെ കുറിച്ച് മനസ്സുതുറക്കുകയാണ്.
തന്റെ കരിയറിന്റെ തുടക്കകാലത്ത് തനിക്കൊപ്പം ജൂനിയർ ആർട്ടിസ്റ്റായി കൂടെ ഉണ്ടായിരുന്നവരെല്ലാം ഇന്ന് വലിയ താരങ്ങളാണെന്ന് കിരൺ പറയുന്നു. താരത്തിന്റെ പേര് വെളിപ്പെടുത്താൻ താൽപ്പര്യപ്പെടുന്നില്ലെന്നും നടൻ കൂട്ടിച്ചേർത്തു.
അദ്ദേഹവുമായി ഇപ്പോഴും വളരെ നല്ല ബന്ധമാണ് ഉള്ളത്. ദിലീപ് നായകനായ വാർ ആൻഡ് ലവ് എന്ന ചിത്രത്തിൽ ഞങ്ങൽ രണ്ടുപേരും ഒരുമിച്ചാണ് തുടക്കമിട്ടത്. ഇന്ന് മുൻനിരനായകൻമാരായുള്ള മിക്കവരും സിനിമയിലെ പട്ടാളക്കാരുടെ കൂട്ടത്തിൽ ഉണ്ടായിരുന്നു. സംവിധായകൻ വിനയന്റെ പടത്തിലേയ്ക്ക് ജൂനിയർ ആർട്ടിസ്റ്റുകളെ വേണം എന്ന് അറിഞ്ഞാണ് സിനിമയിലേയ്ക്ക് എത്തിയതെന്നും കിരൺ പറയുന്നു.
ചെങ്കൽപേട്ടിൽ ആയിരുന്നു ചിത്രത്തിന്റെ ഷൂട്ടിംഗ്. ജൂനിയർ ആർട്ടിസ്റ്റ് എന്താണെന്ന് പോലും അറിയാത്ത കാലമായിരുന്നു അത്. അവിടെയെത്തിയപ്പോൾ തന്നെപ്പോലെ ഒരുപാട് പേരുണ്ടായിരുന്നു. വലിയ പ്രതീക്ഷയുമായിട്ടാണ് ആ സെറ്റിൽ എത്തിയത്. എന്നാൽ പ്രതീക്ഷിച്ചതുപോലെ ഒരു രംഗമോ, ക്ലോസ് അപ് ഷോട്ടോ ഒന്നും എനിക്കുണ്ടായിരുന്നില്ല. അതൊക്കെ വലിയ നിരാശയായി തോന്നിയിരുന്നു എന്നും താരം ഒരു അഭിമുഖത്തിലൂടെ വ്യക്തമാക്കി.
