മെറ്റയുടെ ത്രെഡ്‌സിന് ലോകമെമ്പാടും ലഭിച്ചത് വളരെ വലിയ സ്വീകാര്യതയായിരുന്നു. എന്നാൽ ആപ്പ് ആരംഭിച്ച് അധിക ദിനങ്ങൾ പിന്നിടുന്നതിന് മുൻപ് തന്നെ ആദ്യ നിരോധനവും വന്നിരിക്കുകയാണ്. ത്രെഡ്‌സിനുള്ള ആദ്യ നിരോധനം ഏർപ്പെടുത്തിയിരിക്കുന്നത് ഇറാനിൽ ആണ്. ആപ്പിൽ കയറാൻ ശ്രമിച്ചെങ്കിലും ബ്ലോക്ക് ചെയ്‌തെന്ന് പലരും സമൂഹമാദ്ധ്യമങ്ങളിലൂടെ പങ്കുവെച്ചിരുന്നു. എന്നാൽ രസകരമായ വാസ്തവമെന്തെന്നാൽ ഇറാനിയൻ പ്രസിഡന്റ് ഇബ്രാഹിം റെയ്‌സിക്ക് ത്രെഡ്‌സിൽ അക്കൗണ്ട് ഉണ്ടെന്നുള്ളതാണ്.
പ്രസിഡന്റ് ഇബ്രാഹിം റെയ്‌സി അക്കൗണ്ട് തുടങ്ങി മണിക്കൂറുകൾക്കുള്ളിൽ ത്രെഡ്‌സിന് ഇറാൻ നിരോധനം ഏർപ്പെടുത്തുകയായിരുന്നു. ഈ കഴിഞ്ഞ വ്യാഴാഴ്ചയാണ് റെയ്‌സി ത്രെഡ്‌സിൽ അക്കൗണ്ട് ആരംഭിയ്‌ക്കുന്നത്. വെള്ളിയാഴ്ച ഉച്ചയോടെ 27000 ഫോളോവേഴ്‌സിനെയും അദ്ദേഹം സ്വന്തമാക്കി. എന്നാൽ റെയ്‌സിയുടെ അക്കൗണ്ടിൽ നിന്നും ഇതുവരെയും പോസ്റ്റുകൾ ഒന്നും തന്നെ വന്നിട്ടില്ല. അദ്ദേഹത്തിന്റെ പ്രസിഡൻഷ്യൽ ഓഫീസിലെ സ്റ്റാഫുകളാണ് ഈ അക്കൗണ്ട് കൈകാര്യം ചെയ്യുന്നത്. എന്നാൽ പല ഇറാനിയൻ പൗരന്മാരും തങ്ങൾക്ക് ത്രെഡ്‌സ് ലഭ്യമാകുന്നില്ല എന്ന് പിന്നാലെ അറിയിക്കുകയായിരുന്നു.
വ്യാഴാഴ്ച വൈകിട്ടോടെയായിരുന്നു ആപ്പിന് നിരോധനം ഏർപ്പെടുത്തിയത്. എന്നാൽ ഇത് സംബന്ധിച്ച് ഔദ്യോഗിക പ്രഖ്യാപനങ്ങളൊന്നും തന്നെ നടത്തിയിട്ടില്ല. ഇൻസ്റ്റഗ്രാം, ട്വിറ്റർ, ഫേസ്ബുക്ക് എന്നിവയും ഇത്തരത്തിൽ അപ്രഖ്യാപിത വിലക്ക് നേരിടുന്നുണ്ട്. ഇവ ലോഗിൻ ചെയ്യണമെങ്കിൽ വിപിഎൻ അല്ലെങ്കിൽ പ്രോക്‌സി സേവനങ്ങൾ ആവശ്യമാണ്. ഇറാനിൽ പലരും ഇത്തരത്തിൽ പ്രോക്സിയിലൂടെയാണ്് ത്രെഡ്‌സിൽ അക്കൗണ്ട് സൃഷ്ടിച്ചത്. അതേസമയം ഇറാനിലെ പോലെ തന്നെ ത്രെഡ്‌സ് യൂറോപ്പിലും ലഭ്യമാകുന്നില്ല എന്ന റിപ്പോർട്ടുകളും പുറത്തു വന്നിരുന്നു.
