ഇന്ത്യൻ ക്രിക്കറ്റ് ചരിത്രത്തിലെ ഇതിഹാസ താരങ്ങളിൽ ഒരാളാണ് മുൻ ഇന്ത്യൻ ക്യാപ്റ്റൻ എംഎസ് ധോണി. രാജ്യാന്തര ക്രിക്കറ്റിൽ നിന്ന് വിരമിച്ചതിന് ശേഷവും അദ്ദേഹത്തിന് ആരാധകരിൽ നിന്ന് ലഭിയ്ക്കുന്ന സ്നേഹവും പിന്തുണയും വളരെ വലുതാണ്. കളിക്കളത്തിന് ഉള്ളിലും പുറത്തും മികച്ച നേട്ടങ്ങൾ ഒരേപോലെ കൈവരിച്ച അപൂർവ്വം താരങ്ങളിലൊരാളാണ് ഇദ്ദേഹവും. ക്രിക്കറ്റിൽ ഏറ്റവും അധികം പ്രതിഫലം ലഭിയ്ക്കുന്ന കളിക്കാരിൽ ഒരാൾ എന്ന പ്രത്യേകതയും ധോണിയ്ക്കുണ്ട്. ഇപ്പോഴിതാ ധോണിയുടെ ആസ്തി 1,000 കോടി കടന്നതായാണ് പുറത്തു വരുന്ന റിപ്പോർട്ടുകൾ.
1,040 കോടി രൂപയാണ് എംഎസ് ധോണിയുടെ നിലവിലുള്ള ആസ്തിയെന്ന് വ്യാപാരനിക്ഷേപക കമ്പനിയായ ‘സ്റ്റോക് ഗ്രോ’ പുറത്തു വിട്ട കണക്കുകൾ സൂചിപ്പിക്കുന്നു. കമ്പനി ഔദ്യോഗികമായി പുറത്തുവിട്ട കണക്കുകൾ അനുസരിച്ച് നിലവിൽ ചെന്നൈ സൂപ്പർ കിംഗ്സിൽ നിന്ന് 12 കോടി രൂപയാണ് ധോണിയ്ക്ക് ലഭിയ്ക്കുന്നത്. ഇതിന് പുറമേ ഒരു ബ്രാൻഡ് പ്രമോട്ട് ചെയ്യുന്നതിന് നാല് മുതൽ ആറ് കോടി വരെയും ലഭ്യമാകുന്നുണ്ട്. സമൂഹമാദ്ധ്യമങ്ങളിലൂടെ ധോണി സമ്പാദിയ്ക്കുന്നത് രണ്ട് കോടി രൂപയാണ്. മൂന്ന് ബ്രാൻഡുകളുടെ ഉടമസ്ഥാവകാശമുള്ള ധോണിയ്ക്ക് റിയൽ എസ്റ്റേറ്റിലും നിക്ഷേപങ്ങളുണ്ട്.
ഇതിന് പുറമേ അദ്ദേഹത്തിന് റാഞ്ചിയിൽ ഒരു ഫാം എസ്റ്റേറ്റ് ഉണ്ട്. ബൈക്ക് പ്രേമിയായ ധോണിയ്ക്ക് ഇരുചക്രവാഹനങ്ങളുടെ വൻ ശേഖരം തന്നെയാണ് ഉള്ളത്. അതേസമയം ആസ്തിയിൽ ധോണിയ്ക്ക് മുന്നിലാണ് മുൻ ഇന്ത്യൻ ക്യാപ്റ്റൻ വിരാട് കോഹ്ലി. സ്റ്റോക്ക് ഗ്രോ പുറത്തു വിട്ട കണക്കുകൾ പ്രകാരം 1050 കോടിയാണ് കോഹ്ലിയുടെ ആസ്തി.
Comments