ഒരു സാരിയുടെ വില 21 ലക്ഷം; ഒറ്റനൂലിൽ തീർത്ത അത്ഭുതം; സ്വരോവ്സ്കി മുത്തുകൾ കൊണ്ടുള്ള ചിത്രപ്പണികൾ; ഇന്ത്യയിൽ ഈ സാരി ലഭിക്കുന്നത് ഒരിടത്ത് മാത്രം

ലക്നൗ: ഇന്ത്യൻ സംസ്കാരത്തെയും പാരമ്പര്യത്തെയും കുറിച്ച് പറയുമ്പോൾ എല്ലാവരുടെയും മനസ്സിലേക്ക് ഓടി വരുന്ന ഒന്നാണ് സാരി. ഭാരതീയരുടെ സംസ്കാരത്തിന്റെ ഭാ​ഗമായ ഏറ്റവും മനോഹരമായ വസ്ത്രമാണിത്. വ്യത്യസ്ത തരത്തിലുള്ള വസ്ത്രങ്ങൾ ധരിക്കാൻ എല്ലാവർക്കും ഇഷ്ടമാണെങ്കിലും സാരി ധരിക്കുമ്പോൾ പ്രത്യേക തരം ഭം​ഗിയാണ്. ബനാറസി സാരി മുതൽ കാഞ്ജീവരം സാരി വരെ വ്യത്യസ്ത ഡിസൈനുകളിലും ഇനങ്ങളിലും സാരികളുണ്ട്.

ഇപ്പോഴിതാ, സാരി പ്രേമികളുടെ ഇടയിൽ ശ്രദ്ധ നേടുന്നത് 21 ലക്ഷം രൂപയുടെ ഒരു സാരിയാണ്. ഇത്രയും ഭീമമായ തുകയിൽ ഈ സാരി വിൽക്കുന്നതിന് നിരവധി കാരണങ്ങളുണ്ട്. ഏകദേശം രണ്ട് വർഷമെടുത്ത് ഒരൊറ്റ നൂലിലാണ് ഈ സാരി നിർമ്മിച്ചതെന്നാണ് നിർമ്മാതാവ് ഹൈദർ അലി ഖാൻ പറയുന്നത്. കൂടാതെ, ജപ്പാനിൽ നിന്നുള്ള യഥാർത്ഥ സ്വരോവ്സ്കി മുത്തുകളും ഈ സാരിയിൽ ഉപയോ​ഗിച്ചിട്ടുണ്ട്. ഉപഭോക്താക്കളെ അത്രയധികം ആകർഷിക്കുന്ന തരത്തിലാണ് ഈ സാരിയുടെ മുഴുവൻ വർക്കുകളും.

വെള്ള നിറത്തിൽ രാജകീയ പ്രൗഢി തോന്നുന്ന തരത്തിലാണ് ഇതിന്റെ ഡിസൈൻ. ഇതിൽ കോഴിതൂവലിന്റെ ആകൃതിയിൽ 32 തുന്നലുകളുണ്ട്. ഇവ കരകൗശല വിദഗ്ധർ നിർമ്മിച്ചതാണ്. ഇത് കൂടാതെ സാരിയുടെ മറ്റൊരു സവിശേഷത ലക്നൗവിൽ മാത്രമേ ഈ സാരി ലഭിക്കുകയുള്ളൂ എന്നാതാണ്. ലക്നൗവിലെ ഹസ്രത്ഗഞ്ചിൽ സ്ഥിതി ചെയ്യുന്ന അഡാ ഡിസൈനർ ചിക്കൻ സ്റ്റുഡിയോയാണ് ഈ സാരി ഒരുക്കിയിരിക്കുന്നത്. ണ്ട് വർഷം മുമ്പ് തന്നെ സാരി നിർമ്മിക്കാൻ തുടക്കം കുറിച്ചിരുന്നുവെന്ന് ഹൈദർ അലി ഖാൻ പറയുന്നു.