അർജുൻ അശോകൻ നായകനായെത്തുന്ന പുതിയ ചിത്രം ‘തീപ്പൊരി ബെന്നി’യുടെ ടീസർ പുറത്ത്. ടീസർ പുറത്തിറങ്ങി മണിക്കൂറുകൾക്കുള്ളിൽ തന്നെ തീപ്പൊരി ബെന്നിയും കൂട്ടരും സോഷ്യൽ മീഡിയയിൽ തരംഗമാകുകയാണ്. എൺപത് കാലഘട്ടത്തിലെ ഡിസ്‌കോ ഡാൻസ് ഗാനങ്ങളെ ഓർമ്മിപ്പിക്കുന്ന രീതിയിലുള്ളതാണ് ടീസർ.
അർജുൻ അശോകനും ഷാജു ശ്രീധറും റാഫിയും ചേർന്നുള്ള കിടിലൻ ഫയർ ഡാൻസാണ് ടീസറിൽ കാണിച്ചിരിക്കുന്നത്. നർമ്മത്തിന് പ്രധാന്യം കൊടുത്തിരിക്കുന്ന ടീസർ പ്രേക്ഷകർക്കിടയിൽ ചിത്രത്തിന് പ്രതീക്ഷ കൂട്ടുകയാണ്. ചിത്രത്തിന്റെ ഫസ്റ്റ് ലുക്ക് പോസ്റ്ററും ശ്രദ്ധ നേടിയിരുന്നു. ഒരു തൊഴുത്തിന്റെ പശ്ചാത്തലത്തിൽ നായകനെയും മറ്റു കഥാപാത്രങ്ങളെയും പരിചയപ്പെടുത്തുന്നതായിരുന്നു പോസ്റ്റർ.
അർജുൻ അശോകന്റെതായി അവസാനം പുറത്തുവന്ന രോമാഞ്ചം, പ്രണയവിലാസം എന്നീ ചിത്രങ്ങൾ ഹിറ്റായിരുന്നു. തീപ്പൊരി ബെന്നിയും സിനിമാപ്രേമികളുടെ പ്രിയം നേടുമെന്നാണ് ടീസറിൽ നിന്ന് ലഭിക്കുന്ന സൂചന. മിന്നൽ മുരളിയിലൂടെ ശ്രദ്ധേയയായ ഫെമിനാ ജോർജ്ജാണ് ചിത്രത്തിലെ നായിക. ജഗദീഷ്, ടി.ജി.രവി, പ്രേംപ്രകാശ്, സന്തോഷ് കീഴാറ്റൂർ, ഷാജു ശ്രീധർ, ശ്രീകാന്ത് മുരളി, റാഫി, നിഷാ സാരംഗ് എന്നിവരാണ് ചിത്രത്തിലെ മറ്റുതാരങ്ങൾ.
