മുംബൈ: ലോകത്തെ മികച്ച വിമാനത്താവളങ്ങളുടെ പട്ടികയിൽ ഇടം പിടിച്ച് ഇന്ത്യയിലെ ഛത്രപതി ശിവാജി മഹാരാജ് വിമാനത്താവളം. പട്ടികയിൽ ഇടം നേടിയ ഇന്ത്യയിലെ ഏക വിമാനത്താവളമാണിത്. ദുബായിലെയും ദോഹയിലെയും വിമാനത്താവളങ്ങൾ ഒന്ന് മുതൽ മൂന്ന് വരെയുള്ള സ്ഥാനങ്ങൾ കരസ്ഥമാക്കിയപ്പോൾ 4-ാം സ്ഥാനം നേടിയത് മുംബൈയിലെ ഛത്രപതി ശിവാജി മഹാരാജ് വിമാനത്താവളമായിരുന്നു.
യുഎസ് അടിസ്ഥാനമാക്കി പ്രവർത്തിക്കുന്ന യാത്രാ മാഗസീനായ ‘ട്രാവൽ പ്ലസ് ലിഷർ’ നടത്തിയ സർവേയിലാണ് കണ്ടെത്തൽ. വിമാനത്താവളത്തിലേയ്ക്കുള്ള പ്രവേശനം, സുരക്ഷാ ക്രമീകരമങ്ങൾ, റെസ്റ്റോറന്റ്, ബാറുകൾ തുടങ്ങിയ മാനദണ്ഡങ്ങളായിരുന്നു സർവേയ്ക്ക് പരിഗണിച്ചത്. 1,65,000 വായനക്കാർ സർവേയിൽ പങ്കെടുത്തിരുന്നു.
ലോകോത്തര ആതിഥ്യമര്യാദയ്ക്കൊപ്പം യാത്രക്കാർക്ക് മികച്ച യാത്രാ സേവനങ്ങൾ നൽകുന്നതിൽ വിമാനത്താവളം നേടിയ ഈ അംഗീകാരം എടുത്ത് പറയേണ്ടതാണെന്ന് മുംബൈ എയർപോർട്ട് അധികൃതർ അറിയിച്ചു. ഇന്ത്യൻ സംസ്കാരത്തെ മനോഹരമായി അവതരിപ്പിക്കുന്നതിലും യാത്രക്കാർക്ക് പകർന്ന് നൽകുന്നതിലും മുംബൈ വിമാനത്താവളത്തിനും വലിയ പങ്കുണ്ടെന്നും അധികൃതർ കൂട്ടിച്ചേർത്തു. ലോകത്തെ മികച്ച ഹോട്ടലുകൾ, റിസോർട്ടുകൾ, സ്പാകൾ, ക്രൂയിസ് ഷിപ്പുകൾ, എയർലൈനുകൾ എന്നിവ കണ്ടെത്താനും വായനക്കാർക്കിടയിൽ ‘ട്രാവൽ പ്ലസ് ലിഷർ’ മാഗസീൻ പ്രതിവർഷം സർവേ നടത്താറുണ്ട്
