എറണാകുളം: മെട്രോമാൻ ഇ.ശ്രീധരൻ മുന്നോട്ടു വച്ച കെ റെയിൽ ബദൽ സ്വീകരിക്കാനൊരുങ്ങി സംസ്ഥാന സർക്കാർ. മുഖ്യമന്ത്രി പിണറായി വിജയൻ ഇ. ശ്രീധരനുമായി കൂടിക്കാഴ്ച നടത്തും. വേഗ റെയിൽ പദ്ധതിയെക്കുറിച്ച് ചർച്ച ചെയ്യാനാണ് കൂടിക്കാഴ്ച. കെ റെയിൽ പ്രതിനിധികളും ഉദ്യോഗസ്ഥരും കൂടിക്കാഴ്ചയിൽ പങ്കെടുക്കും. റെയിൽവേ മേഖലയിലെ വിദഗ്ധരെ കൂടി ഉൾപ്പെടുത്തിയാകും ചർച്ച നടക്കുക. കൂടിക്കാഴ്ച ഈയാഴ്ച തന്നെ ഉണ്ടാകുമെന്നാണ് പുറത്തുവരുന്ന വിവരം.
സിൽവർ ലൈൻ പദ്ധതിയിൽ മാറ്റം വരുത്തിയുള്ള വേഗ റെയിൽ പദ്ധതിയുടെ പുതിയ രൂപരേഖ കഴിഞ്ഞദിവസമാണ് ഇ. ശ്രീധരൻ സർക്കാരിന് കൈമാറിയത്. സർക്കാരിന്റെ ഡൽഹിയിലെ പ്രത്യേക പ്രതിനിധി കെ വി തോമസ് ആണ് കഴിഞ്ഞ ദിവസം രൂപരേഖ സർക്കാരിന് സമർപ്പിച്ചത്.
അതേസമയം കെ റെയിൽ നടപ്പാക്കാനാകില്ലെന്ന് മനസിലാക്കിയ സർക്കാർ പുതിയ രൂപരേഖ സ്വീകരിക്കാനാണ് സാധ്യത. 2016-ൽ ഇ. ശ്രീധരൻ നൽകിയ പദ്ധതിയിൽ നിന്നും വ്യത്യസ്തമായ പദ്ധതി സ്വീകരിച്ചാൽ കേന്ദ്ര സർക്കാരിൽ നിന്നും അനുമതി ലഭിക്കുമെന്നാണ് സർക്കാരിന്റെ പ്രതീക്ഷ. ഈ സാഹചര്യത്തിലാണ് പുതിയ വേഗ റെയിൽ പദ്ധതിയെ കുറിച്ച് ചർച്ച ചെയ്യാൻ മുഖ്യമന്ത്രി ഈ ശ്രീധരനുമായി കൂടിക്കാഴ്ച നടത്തുന്നത്.
