ക്രിക്കറ്റിൽ ലിംഗസമത്വത്തിലേക്കുള്ള സുപ്രധാന ചുവടുവയ്പ്പ് നടത്തി ഇന്റർനാഷണൽ ക്രിക്കറ്റ് കൗൺസിൽ (ഐസിസി). അന്താരാഷ്ട്ര ക്രിക്കറ്റ് കൗൺസിൽ ഇവന്റുകളിൽ പുരുഷ-വനിതാ ടീമുകൾക്ക് തുല്യമായ സമ്മാനത്തുകയാണ് ഭരണസമിതി പ്രഖ്യാപിച്ചത്. ദക്ഷിണാഫ്രിക്കയിലെ ഡർബനിൽ നടന്ന ഐസിസി വാർഷിക സമ്മേളനത്തിലാണ് ഈ ചരിത്ര പ്രഖ്യാപനം.
‘ഇത് ഞങ്ങളുടെ ചരിത്രത്തിലെ ഒരു സുപ്രധാന നിമിഷമാണ്. ഐസിസി ആഗോള ഇവന്റുകളിൽ മത്സരിക്കുന്ന പുരുഷ-വനിതാ ക്രിക്കറ്റ് താരങ്ങൾക്ക് ഇപ്പോൾ തുല്യമായ പ്രതിഫലം ലഭിക്കുന്നതിൽ ഞാൻ സന്തുഷ്ടനാണ്. 2017 മുതൽ എല്ലാ വർഷവും ഇവന്റുകളിൽ സ്ത്രീകളുടെ സമ്മാനത്തുക ഞങ്ങൾ വർദ്ധിപ്പിച്ചു വരുന്നു. തുല്യ സമ്മാനത്തുകയിലെത്തുന്നതിൽ വ്യക്തമായി ശ്രദ്ധ കേന്ദ്രീകരിച്ചു. ഇനി മുതൽ, ഐസിസി വനിതാ ക്രിക്കറ്റ് ലോകകപ്പ് നേടുന്നത് ഐസിസി പുരുഷ ക്രിക്കറ്റ് ലോകകപ്പ് നേടിയതിന് തുല്യമായ സമ്മാനത്തുക ആയിരിക്കും.
ടി20 ലോകകപ്പുകളിലും അണ്ടർ 19 ലോകകപ്പുകളിലും തുല്യമായി തന്നെയായിരിക്കും സമ്മാനത്തുക നൽകുക. ക്രിക്കറ്റ് യഥാർത്ഥത്തിൽ എല്ലാവർക്കും പ്രിയപ്പെട്ട ഒരു കായിക വിനോദമാണ്. ഐസിസി ബോർഡിന്റെ ഈ തീരുമാനം ക്രിക്കറ്റിനെ ശക്തിപ്പെടുത്തും. ഓരോ കളിക്കാരനും നൽകുന്ന സംഭാവനകളെ ഒരേപോലെ ആഘോഷിക്കാനും വിലമതിക്കാനും ഞങ്ങളെ ഈ തീരുമാനം പ്രാപ്തരാക്കുന്നു- ഐസിസി ചെയർമാൻ ഗ്രെഗ് ബാർക്ലേ പറഞ്ഞു.
