കൊല്ലം: കൊട്ടാരക്കര നെടുമൺ കാവ് ശ്രീധർമ്മ ശാസ്താ ക്ഷേത്രത്തിൽ അതി പുരാതനമായ നിലവറ കണ്ടെത്തി. ക്ഷേത്രത്തിന്റെ ചുറ്റമ്പലം പുതുക്കിപ്പണിയുന്നതിനായി ജെ സി ബി ഉപയോഗിച്ച് മണ്ണ് മാറ്റുമ്പോളാണ് നിലവറ കണ്ടെത്തിയത്. പഴയ ചുറ്റമ്പലം പൊളിച്ചു മാറ്റി പുതിയത് പണിയുന്ന പ്രവർത്തി ആയിരുന്നു നടന്നത്.
ഏകദേശം 12 അടിയോളം നീളവും 5 അടി ഉയരവും വരുന്ന നിലവറ യാണ് കണ്ടെത്തിയത്. മണ്ണുമാന്തി യന്ത്രം ഉപയോഗിച്ചു പഴയ ചുറ്റമ്പലത്തിന്റെ കല്ല് ഇളക്കാൻ തുടങ്ങുമ്പോഴാണ് നിലവറ കണ്ടെത്തുന്നത്. 12 അടിയോളം നീളമുള്ള ഇറങ്ങാനുള്ള പടവുകളോടുകൂടിയ ഒരു നിർമ്മിതിയും ഉണ്ട്.
ക്ഷേത്ര ഭാരവാഹികൾ എത്തി നിലവറ തുറന്നു. നിലവറ തുറന്നപ്പോൾ നൂറ്റാണ്ടുകൾ പഴക്കമുള്ള ചെമ്പിന്റെയും ഓടിന്റെയും ക്ഷേത്രാവശ്യങ്ങൾക്കായി ഉപയോഗിക്കുന്ന പാത്രങ്ങളും മറ്റും ലഭിച്ചു. രണ്ട് ചെമ്പ്, ഒരു ഉരുളി, ഒരു വാർപ്പ്, രണ്ട് മണി, ഒരു കുത്തുവിളക്ക്, ചെറിയ രണ്ട് കുടങ്ങൾ, എണ്ണ ഒഴിക്കുന്ന പാത്രം, നിലവിളക്ക്, ഒരു തൂക്കുവിളക്ക് എന്നിവയാണ് കണ്ടെടുത്തത്.
നിലവറ കണ്ടെത്തിയ വിവരം അറിഞ്ഞു ധാരാളം ആളുകൾ ക്ഷേത്രത്തിൽ കാണാൻ എത്തിക്കൊണ്ടിരിക്കുന്നു. റെവന്യൂ വകുപ്പ് അധികൃതരും, ആർക്കിയോളജി വിഭാഗം ഉദ്യോഗസ്ഥരും അടുത്തദിവസങ്ങളിൽ ക്ഷേത്രം സന്ദർശിച്ച് നിലവറയിൽ പരിശോധന നടത്തും.
