സിനിമ മാറ്റി നിർത്തിയാൽ താരങ്ങളുടെ പ്രധാന വരുമാന മാർഗമാണ് പരസ്യം. അതിനാൽ തന്നെ പ്രൊഡക്റ്റിന്റെ വിശ്വാസ്യത ഉറപ്പ് വരുത്താതെ തന്നെ പരസ്യങ്ങളിൽ അഭിനയിക്കുന്നതും വിവാദങ്ങളിൽ പെടുന്നതും പതിവാണ്. ബോളിവുഡ് നടൻ അജയ് ദേവ്ഗണാണ് ഇപ്പോൾ പരസ്യത്തിൽ അഭിനയിച്ചതിന്റെ പേരിൽ വാർത്തകളിൽ ഇടം പിടിച്ചിരിക്കുന്നത്. അതും ഒരു ഒറ്റയാൾ യാചന സമരത്തിന്റെ പേരിൽ. ഓൺലൈൻ ഗെയിമിന്റെ പരസ്യത്തിലാണ് അജയ് പ്രത്യക്ഷപ്പെട്ടത്. അതിനെതിരെയാണ് മഹാരാഷ്ട്രയിലെ നാസിക്കിൽ വ്യത്യസ്തമായ ഒറ്റയാൾ പ്രതിഷേധം അരങ്ങേറിയത്.
അജയ് ദേവ്ഗൺ ഇത്തരം പരസ്യത്തിൽ അഭിനയിക്കാതിരിക്കാൻ പണം അയച്ച് കൊടുക്കാനാണ് യാചാന സമരവുമായി മദ്ധ്യവയസ്കൻ രംഗത്ത് വന്നിരിക്കുന്നത്. സ്വന്തം സ്കൂട്ടറിൽ മൈക്കും അജയ് ദേവ്ഗണിനെതിരെയുള്ള മുദ്രാവാക്യങ്ങളും പ്രദർശിപ്പിച്ചാണ് ഇയാൾ സമരം നടത്തുന്നത്. അജയ് ദേവ്ഗണിനുവേണ്ടി ഫണ്ട് സ്വരൂപിക്കാനുള്ള യാചനാസമരം എന്നാണ് ഇദ്ദേഹത്തിന്റെ കയ്യിലുള്ള പ്ലക്കാർഡുകളിൽ എഴുതിയിരിക്കുന്നത്.
അജയ് ദേവ്ഗണിനെപ്പോലെയുള്ള ആവശ്യത്തിലധികം പണവും പ്രശസ്തിയുമുള്ള നടൻമാർ ഓൺലൈൻ ഗെയിമുകളെ പ്രോത്സാഹിപ്പിക്കുന്നത് ശരിയല്ലെന്ന നിലപാടാണ് ഇദ്ദേഹത്തിനുള്ളത്. ഇത്തരം ഗെയിമുകൾ യുവാക്കളെ തെറ്റായി സ്വാധീനിക്കുമെന്നും ഇത്തരം പരസ്യങ്ങൾക്കെതിരെ നിലകൊള്ളാനുള്ള ഉത്തരവാദിത്തം താരങ്ങൾക്കുണ്ടെന്നും സമരം നടത്തുന്നയാൾ വ്യക്തമാക്കി.
യാചിച്ചുകിട്ടുന്ന പണം അജയ് ദേവ്ഗണിന് അയയ്ക്കാനാണ് തന്റെ തീരുമാനമെന്നും ഇദ്ദേഹം വ്യക്തമാക്കി. താരത്തിന് കൂടുതൽ പണം ആവശ്യമുണ്ടെങ്കിൽ, അത് നൽകാൻ വീണ്ടും യാചിക്കുമെന്നും യാചനാസമരം നടത്തുന്നയാൾ പറഞ്ഞു. ദേശീയ മാദ്ധ്യമത്തിന്റെ അക്കൗണ്ടിലൂടെ യാചനാസമരത്തിന്റെ വീഡിയോ പുറത്തുവന്നിട്ടുണ്ട്.
Comments