ആരാധകർ ഏറെ പ്രതീക്ഷയോടെയും ആകാംക്ഷയോടെയും കാത്തിരിക്കുന്ന ഉണ്ണി മുകുന്ദൻ ചിത്രമാണ് ഗന്ധർവ ജൂനിയർ. ആധുനിക സാങ്കേതിക വിദ്യയുടെ പിൻബലത്തിലാണ് ചിത്രം ഒരുങ്ങുന്നത്. വെർച്വൽ ടെക്നോളജി പ്രൊഡക്ഷനിലാകും ചിത്രം പുറത്തിറങ്ങുകയെന്ന് അണിയറ പ്രവർത്തകർ വ്യക്തമാക്കിയിരുന്നു. ജയസൂര്യ നായകനായെത്തുന്ന കത്തനാരിന് ശേഷം ഈ സാങ്കേതികവിദ്യ ഉപയോഗിക്കുന്ന രണ്ടാമത്തെ ചിത്രമാണ് ഗന്ധർവ ജൂനിയർ.
കഴിഞ്ഞ ഫെബ്രുവരിയിൽ ഗന്ധർവ ജൂനിയറിന്റെ ചിത്രീകരണം ആരംഭിച്ചിരുന്നു. 40 കോടി ബഡ്ജറ്റിലാണ് ചിത്രമൊരുങ്ങുന്നത്. ലോക്കേഷനിൽ നിന്നും ഉണ്ണി മുകുന്ദൻ പങ്കുവെച്ച ചിത്രമാണ് സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നത്. ‘ ഇതിഹാസവും മിത്തും’ എന്ന തലക്കെട്ടിലാണ് ഉണ്ണി മുകുന്ദൻ ചിത്രം പങ്കുവെച്ചിരിക്കുന്നത്. ചിത്രത്തിന് നിരവധി പേരാണ് കമന്റ് ചെയ്തിരിക്കുന്നത്. ഈ ഇതിഹാസ പുരുഷനും മിത്തും ചേർന്നുള്ള സ്ക്രീനിലെ അത്ഭുതത്തിനായി കാത്തിരിക്കുന്നു, അടുത്ത സൂപ്പർ ഹിറ്റ് അടിക്കാനുള്ള മുന്നൊരുക്കങ്ങളാണ് ഇതൊക്കെ, ബാക്കി പുറകേയുണ്ട് എന്നിങ്ങനെ പോവുകയാണ് കമന്റുകൾ.
സെക്കൻഡ് ഷോ, കൽക്കി തുടങ്ങിയ ചിത്രങ്ങളിൽ സഹസംവിധായകൻ ആയിരുന്ന വിഷ്ണു അരവിന്ദ് സ്വതന്ത്ര സംവിധായകൻ ആവുന്ന ചിത്രമാണ് ഗന്ധർവ ജൂനിയർ. കൽക്കിക്കു ശേഷം പ്രവീൺ പ്രഭാറാമും സുജിൻ സുജാതനും ചേർന്ന് തിരക്കഥ എഴുതുന്നു.പേര് സൂചിപ്പിക്കുന്നതുപോലെ തന്നെ ഫാന്റസിയും ഹാസ്യവും കലർന്നതാണ് ചിത്രം. ഒരു ഗന്ധർവന്റെ ഭൂമിയിലേക്കുള്ള അപ്രതീക്ഷിത വരവ് ഉപകാരവും ഉപദ്രവവും ആവുന്ന നർമ്മ നിമിഷങ്ങളിലൂടെയാണ് ചിത്രം മുന്നോട്ട് പോകുന്നത്. 40 കോടി രൂപയാണ് ചിത്രത്തിന്റെ ബഡ്ജറ്റ്.
