ഹൈന്ദവ ദേവതയുടെ പേരിൽ അശ്ലീലം പ്രചരിപ്പിച്ച് ഫേസ്ബുക്ക് പോസ്റ്റിട്ട സന്ദീപാനന്ദഗിരിയ്‌ക്കെതിരെ വിശ്വഹിന്ദു പരിഷത്ത് പോലീസിൽ പരാതി നൽകി. ഹൈന്ദവ വിശ്വാസികളെ വൃണപ്പെടുത്തുന്നതാണെന്ന് ചൂണ്ടിക്കാട്ടി വിശ്വഹിന്ദു പരിഷത്ത് സംസ്ഥാന വൈസ് പ്രസിഡന്റ് അഡ്വ. അനിൽ വിളയിലാണ് പോലീസിൽ പരാതി നൽകിയത്. മാവേലിക്കര പോലീസാണ് കേസ് അന്വേഷിക്കുക.
ഗണപതിയുടെ പിതൃത്വത്തെ നിന്ദ്യവും നീചവുമായ രീതിയിൽ വിവരിക്കുന്നതാണ് സന്ദീപാനന്ദ ഗിരിയുടെ ഫേസ്ബുക്ക് പോസ്റ്റ്. മതസ്പർദ്ധ ഉണ്ടാക്കുന്നതും വിശ്വാസത്തെ ഹനിക്കുന്നതുമായ ഫേസ്ബുക്ക് കുറിപ്പിട്ട സന്ദീപാനന്ദഗിരിയ്‌ക്കെതിരെ ഇന്ത്യൻ ശിക്ഷാനിയമം 153 (a), 153 (b), 295, 298 വകുപ്പുകൾ പ്രകാരവും ഐ.ടി നിയമം 67 വകുപ്പുകൾ പ്രകാരവും കേസെടുക്കണമെന്നാണ് പരാതിയിൽ പറയുന്നത്.
കോട്ടയം എൻഎസ്എസിലെ കുട്ടികളോട് ഗണപതിയുടെ തല പോയി ആനയുടെ തല വെച്ചതിന് പിന്നിലെ കഥ പറഞ്ഞുകൊടുത്തെന്ന് പറയുകയും തുടർന്നുള്ള ഫേസ്ബുക്ക് കുറിപ്പിൽ ഹൈന്ദവ ദേവതയെ ചേർത്ത് അശ്ലീല പരാമർശം നടത്തുകയുമായിരുന്നു. ഒരേസമയം പോസ്റ്റിലൂടെ ഹിന്ദു വിശ്വാസത്തെയും നായർ സമാജത്തെയും ഇയാൾ ആക്രമിക്കുകയാണ് ചെയ്തത്. ഇതിനെതിരെയാണ് വിശ്വഹിന്ദു പരിഷത്ത് രംഗത്ത് വന്നിരിക്കുന്നത്.
