നടപ്പ് സാമ്പത്തിക വർഷത്തെ ആദ്യ പകുതിയിലെ വിൽപന കണക്കുകൾ പുറത്തുവരുമ്പോൾ മികച്ച പ്രകടനവുമായി ടാറ്റാ മോട്ടോഴ്സ്. ടാറ്റ നെക്സോൺ 87,501 യൂണിറ്റ് വിൽപനയോടെ ഏറ്റവുമധികം വിറ്റഴിക്കപ്പെടുന്ന എസ്യുവിയായി ഉയർന്നു. നെക്സോൺ, പഞ്ച് സബ്-4 മീറ്റർ എസ്യുവികളുടെ മൊത്തം 1,54,618 യൂണിറ്റുകൾ കമ്പനി വിറ്റുവെന്നാണ് കണക്ക്.
നെക്സോൺ പുത്തൻ ഭാവത്തിലും രൂപത്തിലും പുറത്തിറക്കാനും ടാറ്റാ പദ്ധതിയിടുന്നുണ്ട്. വാഹനത്തിന്റെ അകത്തും പുറത്തും ഡിസൈൻ മാറ്റങ്ങൾ കൊണ്ടുവരുമെന്നാണ് വിവരം. ഫെയ്സ് ലിഫ്റ്റിന് പുതിയ 1.2 എൽ ടർബോചാർജ്ഡ് പെട്രോൾ എഞ്ചിൻ ലഭിക്കുമെന്നാണ് പ്രതീക്ഷിക്കുന്നത്. കൂടാതെ നിലവിലുള്ള 1.5 എൽ ഡീസൽ എഞ്ചിൻ ഓപ്ഷനോടൊപ്പം 7-സ്പീഡ് സിസിടി ഓട്ടോമാറ്റിക് ഗിയർബോക്സും ലഭ്യമാണെന്ന് റിപ്പോർട്ടുകളുണ്ട്. അൾട്രോസ് ഹാച്ച്ബാക്കിലെ ഡ്യുവൽ സിഎൻജി സാങ്കേതികവിദ്യം ഉപയോഗിച്ച് പഞ്ച് മൈക്രോ എസ്യുവിയുടെ സിഎൻജി പതിപ്പും അവതരിപ്പിക്കുമെന്നും റിപ്പോർട്ടുണ്ട്.
ഇന്ത്യൻ വിപണിയിൽ വൻ വഴിത്തിരിവായിരുന്നു ടാറ്റ അവതരിപ്പിച്ച നെക്സോൺ. ഇന്ത്യൻ വാഹനങ്ങളിൽ ഏറ്റവും സുരക്ഷിതമായ മോഡൽ, പെട്രോൾ-ഡീസൽ എഞ്ചിനുകളിൽ മികച്ച മൈലേജ് തുടങ്ങി ഇന്ത്യയിലെ വാഹന ഉപയോക്താക്കൾക്ക് വേണ്ടെതല്ലാം നെക്സോണിലൂടെ നൽകാൻ ടാറ്റയ്ക്ക് കഴിഞ്ഞുവെന്നതാണ് ഈ വാഹനത്തെ ഏറെ ജനപ്രിയമാക്കുന്നത്. 2017 സെപ്റ്റംബറിലാണ് ഇന്ത്യയിലെ കോംപാക്ട് എസ്യുവി ശ്രേണിയിൽ ടാറ്റാ നെക്സോൺ എത്തുന്നത്.
Comments