സൺറൈസേഴ്സ് ഹൈദ്രാബാദിന് ഇനി പുതിയ പരിശീലകൻ. കിവീസ് ഇതിഹാസം ഡാനിയൽ വെട്ടോറിയെ മുഖ്യപരിശീലകനായി നിയമിച്ചെന്ന് സൺറൈസേഴ്സ് സമൂഹമാദ്ധ്യമങ്ങളിലൂടെ വ്യക്തമാക്കി. വിൻഡീസ് ഇതിഹാസം ബ്രയാൻ ലാറയ്ക്ക് പകരം ആണ് ഡാനിയേൽ വെട്ടോറി എത്തുന്നത്.
റോയൽ ചലഞ്ചേഴ്സ് ബെംഗളുരുവിനെ പരിശീലിപ്പിച്ചിരുന്ന വെട്ടോറി നാലു വർഷത്തിന് ശേഷം ടീമുമായി വഴിപിരിയുകയായിരുന്നു. 2014-18 കാലയളവിലാണ് റോയൽ ചലഞ്ചേഴ്സിനെ കിവീസ് ഇതിഹാസം പരിശീലിപ്പിച്ചത്. നിലവിൽ ദി ഹണ്ട്രെഡിലെ ബിർമ്മിംഗാം ഫീനിക്സിന്റെ പുരുഷ ടീമിന്റെ കോച്ച് കൂടിയാണ് വെട്ടോറി.
2015ൽ ആർസിബിയെ പ്ലേ ഓഫിലേക്കും 2016ൽ ടീം റണ്ണേഴ്സ് അപ്പ് ആയപ്പോളും കോച്ചായി പ്രവർത്തിച്ചത് വെട്ടോറി ആയിരുന്നു. 2022 മുതൽ ഓസ്ട്രേലിയൻ ടീമിന്റെ പരിശീലക സംഘത്തിലുണ്ടായിരുന്ന വെട്ടോറി ബംഗ്ലാദേശിന്റെ സ്പിൻ ബൗളിംഗ് കൺസട്ടന്റായും പ്രവർത്തിച്ചിരുന്നു. 44കാരനായ വെട്ടോറി 34 ഐപിഎൽ മത്സരങ്ങളിൽ നിന്ന് 28 വിക്കറ്റ് നേടിയിരുന്നു
സൺറൈസേഴ്സിന്റെ ബാക്കി പിന്തുണ സ്റ്റാഫ് മാറുമോയെന്ന കാര്യം വ്യക്തമായിട്ടില്ല. 2023ൽ 4 വിജയം മാത്രം നേടിയ സൺറൈസേഴ്സ് പോയിന്റ് പട്ടികയിൽ അവസാന സ്ഥാനത്ത് ആയിരുന്നു.
Comments