ചെന്നൈ: ഏഷ്യൻ ചാമ്പ്യൻസ് ട്രോഫി ഹോക്കിയിൽ ഇന്ത്യ- പാക് പോരാട്ടം ഇന്ന് രാത്രി 8.30ന്. സെമി ബെർത്ത് ഉറപ്പിച്ചെങ്കിലും ഇന്ത്യക്കിത് അഭിമാനപ്പോരാട്ടമാണ്. ഇന്ന് ഇന്ത്യയ്‌ക്കെതിരെ ജയിക്കാനായാൽ പാകിസ്താന് സെമി ഉറപ്പിക്കാം. സ്റ്റാർ സ്‌പോർട്‌സ് സിലക്ട് 2 ചാനലിലും ഫാൻകോഡ് ആപ്പിലും മത്സരം തത്സമയം കാണാം.
ഇതുവരെ നടന്ന 4 മത്സരങ്ങളിൽ നിന്ന് 3 ജയവും 1 സമനിലയുമടക്കം 10 പോയിന്റാണ് ഇന്ത്യ നേടിയത്. എന്നാൽ ഒരു ജയവും സമനിലയും രണ്ട് തോൽവി എന്നതാണ് പാകിസ്താന്റെ സ്ഥിതി. ഇന്ത്യക്കെതിരെ ജയിക്കാനായില്ലെങ്കിൽ ചൈന-ജപ്പാൻ, ദക്ഷിണകൊറിയ- മലേഷ്യ മത്സരഫലങ്ങൾ പാകിസ്താന്റെ വിധി നിർണയിക്കും.
മൂന്നു തവണ വീതം ഇന്ത്യയും പാകിസ്താനും ടൂർണമെന്റിൽ കിരീടം ചൂടിയിട്ടുണ്ട്. എന്നാൽ സമ്മർദ്ദത്തെ അതിജീവിച്ച് പെനാൽറ്റി കോർണർ ഉൾപ്പെടെയുളള അവസരങ്ങൾ പ്രയോജനപ്പെടുത്താനാണ് ഇരുടീമുകളും ശ്രമിക്കുക. ഫിനിഷിംഗിലെ പോരായ്മയും രാജ്യാന്തര മത്സരങ്ങളിലെ പരിചയക്കുറവും പാകിസ്താനെ വലയ്‌ക്കുന്നുണ്ട്. ഇന്ത്യയെ ഇന്ന് തോൽപ്പിച്ചാലും സെമിയിൽ വീണ്ടും ഇന്ത്യയായിരിക്കും പാകിസ്താന്റെ എതിരാളികൾ.
