ന്യൂഡൽഹി: ഏഷ്യൻ ചാമ്പ്യൻസ് ഹോക്കി ട്രോഫി കിരീടത്തിൽ മുത്തമിട്ടതോടെ എഫ്ഐഎച്ച് (ഇന്റർനാഷണൽ ഹോക്കി ഫെഡറേഷൻ) റാങ്കിംഗിൽ മൂന്നാം സ്ഥാനത്തേക്ക് ഉയർന്ന് ഇന്ത്യൻ പുരുഷ ഹോക്കി ടീം. ഇംഗ്ലണ്ടിനെ പിന്നിലാക്കി 2771.35 പോയിന്റോടെയാണ് ഇന്ത്യ മൂന്നാം സ്ഥാനത്തെത്തിയത്. ഒന്നാം സ്ഥാനത്തുള്ള നെതർലൻഡിന് 3095.90 പോയിന്റും രണ്ടാം സ്ഥാനത്തുളള ബെൽജിയത്തിന് 2917.87 പോയിന്റുമാണുളളത്.
ഇത് രണ്ടാം തവണയാണ് ഇന്ത്യ എഫ്ഐഎച്ച്(ഇന്റർനാഷണൽ ഹോക്കി ഫെഡറേഷൻ) റാങ്കിംഗിൽ മൂന്നാം സ്ഥാനത്തെത്തുന്നത്. 2021ൽ ടോക്കിയോ ഒളിമ്പിക്‌സിൽ വെങ്കലം നേടിയതിന് ശേഷം ഇന്ത്യ മൂന്നാം സ്ഥാനത്തെത്തിയിരുന്നു. 41 വർഷങ്ങൾക്ക് ശേഷമായിരുന്നു ഇന്ത്യ ടോക്കിയോ ഒളിമ്പിക്‌സിൽ മെഡൽ നേടിയത്. മലേഷ്യയെ 4-3ന് പരാജയപ്പെടുത്തിയാണ് ഹർമൻപ്രീത് സീംഗ് നായകനായ ഇന്ത്യൻ ടീം ഏഷ്യൻ ചാമ്പ്യൻ ട്രോഫിയിൽ കിരീടം നേടിയത്.
ചൈനയിലെ ഹാങ്ഷൗവിൽ സെപ്റ്റംബർ 23 മുതൽ നടക്കുന്ന ഏഷ്യൻ ഗെയിംസാണ് ഇന്ത്യൻ ഹോക്കി ടീമിന്റെ അടുത്ത ടൂർണമെന്റ്. ഏഷ്യൻ ചാമ്പ്യൻസ് ട്രോഫിയിൽ റണ്ണേഴ്സ് അപ്പായ മലേഷ്യ എഫ്ഐഎച്ച്(ഇന്റർനാഷണൽ ഹോക്കി ഫെഡറേഷൻ) റാങ്കിംഗിൽ ഒമ്പതാം സ്ഥാനത്തും പാകിസ്താൻ 16-ാം സ്ഥാനത്തുമാണ്.
