വെസ്റ്റ് ഇൻഡീസിനെതിരായ ടി20 പരമ്പരയുടെ തോൽവിയുടെ ഉത്തരവാദിത്വം ഏറ്റെടുത്ത് ക്യാപ്റ്റൻ ഹാർദ്ദിക് പാണ്ഡ്യ. ഇന്ത്യയ്ക്ക് പരമ്പര നഷ്ടമായത് കാര്യമാക്കുന്നില്ലെന്നും ഇടയ്ക്ക് തോൽവിയറിയുന്നത് നല്ലതാണെന്നും പാണ്ഡ്യ പറഞ്ഞു. ഞാൻ ഉൾപ്പെടെയുളള ബാറ്റർമാർക്ക് ആദ്യ പത്ത് ഓവറുകൾക്ക് റൺനിരക്ക് ഉയർത്താൻ കഴിയാതെ പോയതാണ് തോൽവിയ്ക്ക് കാരണമെന്നും താരം പറഞ്ഞു.
ഞാൻ ക്രീസിലെത്തിയശേഷം, റൺനിരക്ക് ഉയർത്താൻ കഴിഞ്ഞില്ല. ക്രീസിൽ തന്റേതായ സമയമെടുത്തെങ്കിലും, മികച്ച രീതിയിൽ ഫിനിഷ് ചെയ്യാൻ എനിക്കായില്ല-ഹാർദ്ദിക് പറഞ്ഞു. 14 പന്തിൽ നിന്ന് 18 റൺസെടുത്താണ് മത്സരത്തിൽ ഹാർദ്ദിക് പുറത്തായത്. തോൽവിയിൽ നിന്ന് പല പാഠങ്ങളും പഠിക്കാനുണ്ട്. ഏകദിന ലോകകപ്പും ഏഷ്യാ കപ്പും വരാനിരിക്കുന്നതിനാൽ ഈ തോൽവി നല്ലതാണ്. ടീമിനായി കളിച്ച എല്ലാ താരങ്ങളെയും അഭിനന്ദിക്കുന്നു. എല്ലാവരും മികച്ച പ്രകടനമാണ് കാഴ്്ചവച്ചത്. ജയവും തോൽവിയുമെല്ലാം കളിയുടെ ഭാഗമാണ്. തോൽവിയിൽ നിന്ന് എന്ത് പഠിക്കുന്നു എന്നതാണ് പ്രധാനമെന്നും ഹാർദ്ദിക് പറഞ്ഞു.
ഓരോ മത്സരങ്ങൾക്കും മുന്നോടിയായുള്ള പ്ലാനിംഗിൽ ഞാൻ അധികം വിശ്വസിക്കുന്നില്ല. ക്യാപ്റ്റനെന്ന നിലയിൽ ശരിയെന്ന് തോന്നിയതാണ് ചെയ്തത്. ഈ പരമ്പരയിൽ കളിച്ച ഓരോ കളിക്കാരനും ആത്മവിശ്വാസത്തോടെയാണ് കളിച്ചത്. ഓരോ സാഹചര്യങ്ങളിലും അവർ ഉത്തരവാദിത്തമേറ്റെടുക്കാൻ മുന്നോട്ടുവന്നു. ക്യാപ്റ്റനെന്ന നിലയിൽ തനിക്കിത് സന്തോഷം നൽകുന്ന കാര്യമാണെന്നും പാണ്ഡ്യ കൂട്ടിച്ചേർത്തു.
Comments