ലഡാക്ക്: ലോകത്തിലെ ഏറ്റവും ഉയരം കൂടിയ യുദ്ധഭൂമിയായ സിയാച്ചിൻ മലനിരകളിൽ ദേശീയ പതാക ഉയർത്തി സൈനികർ . സ്വാതന്ത്ര്യ ദിനാഘോഷങ്ങളുടെ ഭാഗമായി. ദേശീയ പതാകയ്ക്ക് മുന്നിൽ ദേശീയഗാനം ആലപിക്കുകയും സല്യൂട്ട് നൽകുകയും ചെയ്യുന്ന ചിത്രം സമൂഹമാദ്ധ്യമങ്ങളിൽ വൈറലായി മാറി.
സിയാച്ചിൻ മേഖല ഭാരത് മാതാ കീ ജയ് വിളികളാൽ പ്രതിധ്വനിച്ചു. അതിർത്തി പ്രദേശങ്ങളിൽ അഭിമാനത്തോടെ ത്രിവർണ പതാക ഉയർത്തിയ സുരക്ഷാ ഉദ്യോഗസ്ഥർ ശത്രുക്കൾക്ക് സ്വന്തം പരിധിയിൽ നിൽക്കാനുള്ള വ്യക്തമായ സന്ദേശവും നൽകി. ജമ്മു കശ്മീരിന്റെയും ലഡാക്കിന്റെയും സുരക്ഷയുടെ ചുമതലയുള്ള ആർമിയുടെ നോർത്തേൺ കമാൻഡിന്റെ ആർമി കമാൻഡർ ലെഫ്റ്റനന്റ് ജനറൽ ഉപേന്ദ്ര ദ്വിവേദി സൈനികർക്ക് സ്വാതന്ത്ര്യദിന ആശംസകൾ നേർന്നു.
സ്വാതന്ത്ര്യ ദിനത്തിൽ ബോർഡർ റോഡ് ഓർഗനൈസേഷൻ ലഡാക്കിലെ രണ്ടാമത്തെ തന്ത്രപ്രധാന പാതയായ ലികാരു-മിഗ് ലാ-ഫൂക്ചെയുടെ നിർമ്മാണം ആരംഭിച്ചു. ലഡാക്കിൽ 19400 അടി ഉയരത്തിൽ നിർമിക്കുന്ന റോഡ് ഈ മേഖലയിലെ ലോകത്തിലെ ഏറ്റവും ഉയരം കൂടിയ വാഹന ഗതാഗതയോഗ്യമായ റോഡായ ഉംലിങ് ലായേക്കാൾ ഉയരത്തിലായിരിക്കും.
സ്വാതന്ത്ര്യ ദിനത്തിൽ കശ്മീരിലെ മച്ചൽ നലയിലെ നിയന്ത്രണരേഖയിലെ അവസാന ഗ്രാമമായ ദന്നയിലെ ജനങ്ങൾക്ക് സൈന്യം 115 അടി നീളമുള്ള പാലം സമ്മാനിച്ചു. വീരചക്ര ജേതാവ് മേജർ ഭഗത് സിംഗിന് സമർപ്പിച്ചിരിക്കുന്ന ഈ പാലം 1971 ലെ യുദ്ധത്തിലെ വിമുക്തഭടൻ മിയാൻ ഗുൽ ഖാൻ നാട മുറിച്ച് ഉദ്ഘാടനം ചെയ്തു.
