സിനിമയിൽ നിന്ന് വിട്ടുനിൽക്കുകയാണെങ്കിലും മലയാളികൾക്ക് മറക്കാൻ കഴിയാത്ത നടിയാണ് കാവ്യാ മാധവൻ. ദിലീപുമായുള്ള വിവാഹത്തിന് ശേഷം അഭിനയം താത്കാലികമായി നിർത്തിവച്ചിരിക്കുകയാണ് താരം. സോഷ്യൽ മീഡിയയിലും കാവ്യ സജീവമായിരുന്നില്ല. ഇപ്പോഴിതാ പുതുവർഷം ആരംഭിച്ചതിന് പിന്നാലെ ഇൻസ്റ്റഗ്രാമിൽ തുടക്കം കുറിച്ചിരിക്കുകയാണ് നടി.
തന്റെ ഏറ്റവും പുതിയ ചിത്രം ഇൻസ്റ്റഗ്രാമിലൂടെ പങ്കുവച്ചുകൊണ്ടായിരുന്നു സോഷ്യൽമീഡിയയിലേക്കുള്ള വരവ് കാവ്യയറിയിച്ചത്. സമൂഹ മാദ്ധ്യമ ലോകത്ത് സജീവമല്ലാത്ത കാവ്യയുടെ കടന്നുവരവ് ആരാധകരും ആവേശത്തോടെ ഏറ്റെടുത്തിരിക്കുകയാണ്. ചിങ്ങം 1 ആയതിനാൽ കേരളാസാരിയണിഞ്ഞു നിൽക്കുന്ന ചിത്രമാണ് കാവ്യ പങ്കുവച്ചിരിക്കുന്നത്. ഇതിനോടകം തന്നെ മൂവായിരത്തിലധികം ഫോളോവേഴ്സിനെ പ്രൊഫൈൽ നേടിക്കഴിഞ്ഞു.
ഒരു കാലത്ത് മലയാള സിനിമയിലെ മുൻനിര നായികമാരിൽ ഒരാളായിരുന്നു കാവ്യ. പിന്നീട് ആദ്യ വിവാഹത്തിന് ശേഷം ചെറിയൊരു ഇടവേള എടുത്തിരുന്നെങ്കിലും ‘ഗദ്ദാമ’യെന്ന സിനിമയിലൂടെ ആദ്യത്തെ തിരിച്ചുവരവ് നടത്തി. 2016ൽ ദിലീപിനൊപ്പം ‘പിന്നെയും’ എന്ന സിനിമയിലാണ് കാവ്യ ഒടുവിലെത്തിയത്. തൊട്ടുപിന്നാലെ തന്റെ രണ്ടാം വിവാഹം ദിലീപുമായി നടന്നു. ഇതോടെ അഭിനയത്തിൽ നിന്ന് വിട്ടുനിന്ന കാവ്യ പിന്നീട് കുടുംബജീവിതത്തിൽ ശ്രദ്ധ കേന്ദ്രീകരിക്കുകയാണ് ചെയ്തത്. ലക്ഷ്യ എന്ന ബ്രാൻഡിന്റെ സിഇഒയാണ് നിലവിൽ താരം.
