പാട്‌ന: രാജ്യത്തെ ഞെട്ടിപ്പിക്കുന്ന വാര്‍ത്തയാണ് ബീഹാറില്‍ നിന്ന് പുറത്തുവരുന്നത്. മുതിര്‍ന്ന മാദ്ധ്യപ്രവര്‍ത്തകനെ വീട്ടില്‍ കയറി വെടിവച്ചുകൊന്നുവെന്ന ദാരുണ സംഭവമാണ് ഇന്ന് രാവിലെ പുറത്തുവന്നത്. ദൈനിക് ജാഗരന്‍ പത്രത്തിന്റെ ലേഖകനായ വിമല്‍കുമാര്‍ യാദവാണ് വീട്ടില്‍ വെടിയേറ്റ് മരിച്ചത്.
ഇന്ന് രാവിലെ ബൈക്കിലെത്തിയ അക്രമികള്‍ വിമല്‍കുമാറിനെ വീട്ടില്‍ നിന്ന് വിളിച്ച് പുറത്തിറക്കി നിരവധി തവണ വെടിയുതിര്‍ക്കുകയായിരുന്നു. റാണിഗഞ്ചിലെ പ്രേംനഗറിലാണ് വിമല്‍കുമാറിന്റെ വീടുള്ളത്. 15-കാരനായ മകനും 13-കാരിയായ മകള്‍ക്കും ഭാര്യയ്‌ക്കുമൊപ്പമാണ് വിമല്‍കുമാര്‍ ഇവിടെ കഴിഞ്ഞിരുന്നത്.
2019ല്‍ വിമല്‍കുമാറിന്‍ സഹോദരനും വെടിയേറ്റ് കൊല്ലപ്പെട്ടിരുന്നു. ആ സംഭവത്തില്‍ ഏക ദൃക്‌സാക്ഷി വിമല്‍കുമാറായിരുന്നു.പോലീസ് നിലവില്‍ ഈ സാദ്ധ്യത പരിശോധിച്ചാണ് അന്വേഷണം നടത്തുന്നത്. മൃതദേഹം അരാരിയയിലെ സാദര്‍ ആശുപത്രിയിലേക്ക് മാറ്റിയെന്നും പോസ്റ്റ്‌മോര്‍ട്ടത്തിന് ശേഷമേ കൂടുതല്‍ വിവരങ്ങള്‍ വ്യക്തമാകൂയെന്നും പോലീസ് പറഞ്ഞു. പ്രദേശത്ത് സംഘര്‍ഷ സാദ്ധ്യത കണക്കിലെടുത്ത് പോലീസ് സംഘം തമ്പടിച്ചിട്ടുണ്ട്.
