ഓണത്തിന്റെ വരവ് അറിയിച്ചുകൊണ്ടുള്ള തൃപ്പൂണിത്തുറ അത്തംഘോഷയാത്ര നാളെ. മുഖ്യമന്ത്രി പിണറായി വിജയൻ നാളെ ഉദ്ഘാടനം നിർവഹിക്കും. ഘോഷയാത്രയുടെ ഫ്ലാഗ് ഓഫ് കർമ്മം നിർവഹിക്കുന്നത് മമ്മൂട്ടിയാണ്. അത്തച്ചമയം ഹരിതച്ചമയം എന്ന പേരിൽ ഹരിത പെരുമാറ്റച്ചട്ടം കർശനമായി പാലിച്ചുകൊണ്ടാണ് അത്തം ഘോഷയാത്ര അരങ്ങേറുന്നത്.
നിശ്ചല ദൃശ്യങ്ങൾക്കൊപ്പം 75-ഓളം കലാരൂപങ്ങളും ഘോഷയാത്രയിൽ ഭാഗമാകും. തൃപ്പൂണിത്തുറ നഗരസഭയുടെ നേതൃത്വത്തിൽ പത്ത് ദിവസം നീണ്ടു നിൽക്കുന്ന വിപുലമായ സാംസ്കാരിക ചടങ്ങുകളാണ് ഇവിടെ നടക്കുക.
അത്തം നാളിൽ കൊച്ചിരാജാവ് സർവാഭരണ വിഭൂഷിതനായി സർവസൈന്യ സമേതനായി കലാസമൃദ്ധിയോടെ ഘോഷയാത്രയിൽ പ്രജകളെ കാണാനെത്തുന്ന ചടങ്ങാണ് രാജഭരണകാലത്തെ അത്തച്ചമയം. 1949 ൽ തിരുവിതാംകൂർ കൊച്ചി സംയോജനത്തോടെ രാജകീയ അത്തച്ചമയം നിർത്തലാക്കിയിരുന്നു. ഇതിന് ശേഷം 1961-ൽ കേരള സർക്കാർ ഓണം സംസ്ഥാനോത്സവമാക്കിയതോടെ ജനകീയ പങ്കാളിത്തമുള്ള ബഹുജനാഘോഷമായി മാറുകയായിരുന്നു.
