ഓണമൊക്കയല്ലേ, ഒരു യാത്ര പോകാമെന്ന് പ്ലാൻ ചെയ്യാത്തവർ ചുരുക്കമായിരിക്കും. വളരെ ചെലവ് കുറഞ്ഞ രീതിയിലാണ് ആ യാത്രയെങ്കിൽ പിന്നെ ഡബിൾ ഹാപ്പി. അത്തരത്തിൽ ചെലവ് ചുരുങ്ങിയ യാത്ര ഒരുക്കുകയാണ് കെഎസ്ആർടിസി. ഓണത്തിനോടനുബന്ധിച്ച് കണ്ണൂർ ഡിപ്പോയിൽ നിന്നാണ് പുതിയ പാക്കേജുകൾ കെഎസ്ആർടിസി അവതരിപ്പിച്ചിരിക്കുന്നത്. വാഗമൺ, മൂന്നാർ, ഗവി, റാണിപുരം എന്നിവിടങ്ങളിലേക്കാണ് യാത്ര.
1) വാഗമൺ-മൂന്നാർ
ഓഗസ്റ്റ് 25, 30 എന്നീ തീയതികളിലാണ് യാത്ര പുറപ്പെടുക. വൈകുന്നേരം ഏഴ് മണിക്ക് കണ്ണൂരിൽ നിന്ന് പുറപ്പെട്ട് രണ്ടാം ദിനം വാഗമണ്ണിലെത്തും. തുടർന്ന് ഓഫ് റോഡ് ജീപ്പ് സവാരിയും ബസിൽ സ്‌പോട്ടുകൾ സന്ദർശിക്കാനും അവസരമുണ്ടാകും. വൈകുന്നേരം ആറ് മണിയോടെ ഹോട്ടലിൽ തിരിച്ചെത്തും. തുടർന്ന് ക്യാമ്പ് ഫയർ.
രണ്ടാം ദിനം രാവിലെ മൂന്നാറിലേക്ക് പുറപ്പെടും. ചതുരംഗപാറ വ്യൂ പോയിന്റ്, ആനയിറങ്ങൽ ഡാം, മാലൈ കള്ളൻ ഗുഹ, ഓറഞ്ച് ഗാർഡൻ, ഗ്യാപ് റോഡ് വ്യൂ, പോയിന്റ് എന്നിവ സന്ദർശിച്ച് അടുത്തദിവസം രാവിലെ ആറുമണിക്ക് കണ്ണൂരിൽ തിരിച്ചെത്തും.
2) മൂന്നാർ
ഓഗസ്റ്റ് 25,30 തീയതികളിൽ കണ്ണൂരിൽ നിന്ന് പുറപ്പെടും. നവൈകുന്നേരം ആറുമണിക്കാകും ബസ് പുറപ്പെടുക. ഇരവികുളം നാഷണൽ പാർക്ക്, എക്കോ പോയിന്റ്, ബോട്ടാണിക്കൽ ഗാർഡൻ, ഫ്‌ലവർ ഗാർഡൻ, ഷൂട്ടിങ് പോയിന്റ്, മാട്ടുപ്പെട്ടി ഡാം എന്നിവ സന്ദർശിച്ച് അന്ന് രാത്രി മൂന്നാറിലെ ഹോട്ടലിലാകും താമസം.
രണ്ടാം ദിനം ചതുരംഗപാറ വ്യൂ പോയിന്റ്, ആനയിറങ്ങൽ ഡാം, പൊന്മുടി ഡാം, മാലൈ കള്ളൻ ഗുഹ, ഓറഞ്ച് ഗാർഡൻ, ഫോട്ടോ പോയിന്റ് എന്നിവ സന്ദർശിച്ച് അടുത്തദിവസം രാവിലെ ആറുമണിക്ക് കണ്ണൂരിൽ തിരിച്ചെത്തും.
3) ഗവി
ഓഗസ്റ്റ് 30-ന് വൈകുന്നേരം അഞ്ച് മണിക്ക് കണ്ണൂരിൽ നിന്നും പുറപ്പെടും. പിറ്റേന്ന് കുമളിയിലെത്തി ജീപ്പിൽ കമ്പത്തേക്ക് പോകും. മുന്തിരിത്തോട്ടം, പച്ചക്കറിത്തോട്ടം, പെൻസ്റ്റോക്ക് പൈപ്പ് ലൈൻ, വ്യൂ പോയിന്റുകൾ എന്നിവ സന്ദർശിച്ച് വൈകിട്ട് ബസിൽ രാമക്കൽമേട് സന്ദർശിച്ച് കുമളിയിലെ ഹോട്ടലിൽ താമസം.
രണ്ടാമത്തെ ദിവസം ഗവിയിൽ ഭക്ഷണവും ബോട്ടിങ്ങും ഉൾപ്പെടെയാണ് പാക്കേജ്. അടുത്തദിവസം രാവിലെ ആറ് മണിക്ക് കണ്ണൂരിൽ തിരിച്ചെത്തും വിധമാണ് ടൂർ പാക്കേജ്.
4) റാണിപുരം-ബേക്കൽ കോട്ട
ഓഗസ്റ്റ് 27-ന് രാവിലെ ആറുമണിക്ക് കണ്ണൂരിൽ നിന്നും പുറപ്പെടും. റാണിപുരം ഹിൽ സ്റ്റേഷൻ, ബേക്കൽ കോട്ട, ബേക്കൽ ബീച്ച് ആന്റ് പാർക്ക് എന്നിവ സന്ദർശിച്ച് രാത്രി ഒൻപത് മണിയോടെ കണ്ണൂരിൽ തിരിച്ചെത്തും.
Comments