മാതാപിതാക്കൾ സൂപ്പർസ്റ്റാറുകളുടെ കടുത്ത ആരാധകരാണെങ്കിൽ അവർക്ക് ജനിക്കുന്ന കുട്ടികൾക്കും ഇഷ്ട താരത്തിന്റെയോ അല്ലെങ്കിൽ താരം അഭിനയിച്ച ചിത്രങ്ങളിലെ കഥാപാത്രങ്ങളുടെയോ പേരായിരിക്കും നൽകുക. ഈ പേരിടൽ ചടങ്ങുകൾ മനുഷ്യരിൽ മാത്രമല്ല, ജന്തുജീവജാലങ്ങൾക്കും ബാധകമായിരിക്കുകയാണ്. ദളപതി രജനികാന്ത് തകർത്തഭിനയിച്ച പടയപ്പ ചലച്ചിത്രത്തിലെ ഗാനം കേട്ട ഒരാന തല കുലിക്കയതോടെ അവനും ‘പടയപ്പ’യായി മാറി. അത്തരത്തിൽ ഹോളിവുഡ് താരം ഹാരിസൺ ഫോർഡിന്റെ നാമം ലഭിച്ച പാമ്പാണ് ഇപ്പോൾ താരം..
പെറുവിലെ ഓറ്റിഷി നാഷണൽ പാർക്കിൽ കണ്ടെത്തിയ പുതിയ സ്പീഷീസ് പാമ്പിനാണ് ഗവേഷകർ സൂപ്പർസ്റ്റാർ ഹാരിസൺ ഫോർഡിന്റെ പേര് നൽകിയത്. പുതിയ സ്പീഷിസുകൾക്ക് പേരിടുമ്പോൾ ശാസ്ത്രജ്ഞർ ക്രിയാത്മകത പ്രകടിപ്പിക്കാറുണ്ട്. അത്തരത്തിൽ 1981-ൽ ‘റൈഡേഴ്‌സ് ഓഫ് ദി ലോസ്റ്റ് ആർക്ക്’ എന്ന ചിത്രത്തിലൂടെ പുറത്തിറങ്ങിയ പരമ്പരയായ ഇൻഡ്യാന ജോൺസിലൂടെ ലോകമെമ്പാടും നിരവധി ആരാധകരെ സ്വന്തമാക്കിയ നടനാണ് ഹാരിസൺ. പരിസ്ഥിതി വിഷയങ്ങളിൽ അദ്ദേഹത്തിന്റെ ഇടപെടൽ കണക്കിലെടുത്താണ് പാമ്പിന് അദ്ദേഹത്തിന്റെ പേര് ബഹുമാനാർത്ഥം നൽകിയത്.
മഞ്ഞ കലർന്ന ബ്രൗൺ നിറത്തോട് കൂടിയ പാമ്പിന്റെ ശരീരത്തിൽ കറുത്ത പാടുകളും കാണാം. ഈ ഉരഗവർഗം ശാസ്ത്രലോകം ഇതിന് മുമ്പ് കണ്ടിട്ടില്ല. കനം കുറഞ്ഞ പാമ്പാണിത്. പൂർണ വളർച്ച എത്തുമ്പോൾ 40 സെന്റിമീറ്ററിലധികം നീളം വെയ്‌ക്കുമെന്നാണ് ഗവേഷകർ കണക്കാക്കുന്നത്. ‘ടാക്കിമെനോയിഡീസ് ഹാരിസൺഫോർഡൈ’ എന്ന് പേരിട്ടിരിക്കുന്ന ഈ പാമ്പ് മനുഷ്യർക്ക് ഉപദ്രവകാരികളല്ലയെന്നും ശാസ്ത്രലോകം വ്യക്തമാക്കി.
