തിരുവനന്തപുരം: തിരുവനന്തപുരം വീണ്ടും ക്രിക്കറ്റ് ആരവമുയരുന്നു. ഏകദിന ക്രിക്കറ്റ് ലോകകപ്പിന്റെ ഭാഗമായുളള സന്നാഹമത്സരം ഒക്ടോബർ 3ന് കാര്യവട്ടം സ്‌പോർട്‌സ് ഹബ്ബിൽ നടക്കും. മത്സരത്തിൽ ഇന്ത്യ- നെതര്ഡലൻഡ്‌സിനെ നേരിടും. ഏകദിന ലോകകപ്പിന് മുമ്പുളള ഇന്ത്യയുടെ രണ്ടാം സന്നാഹമത്സരമാണിത്. സെപ്റ്റംബർ 30ന് ഗുവാഹത്തിയിലാണ് ഇന്ത്യയുടെ ആദ്യ സന്നാഹ മത്സരം. ഇംഗ്ലണ്ടാണ് എതിരാളികൾ. സന്നാഹ മത്സരങ്ങൾ ഉച്ചയ്‌ക്ക് രണ്ട് മണിയ്‌ക്ക് ആരംഭിക്കുമെന്ന് ഐസിസി അറിയിച്ചു.
ഇന്ത്യയുടെ മത്സരം കൂടാതെ മറ്റ് മൂന്ന് മത്സരങ്ങൾക്കാണ് കാര്യവട്ടം ഗ്രീൻഫീൽഡ് സ്റ്റേഡിയം വേദിയാകുക. സെപ്റ്റംബർ 29ന് ദക്ഷിണാഫ്രിക്ക-അഫ്ഗാനിസ്ഥാൻ, സെപ്റ്റംബർ 30ന് ഓസ്‌ട്രേലിയ- നെതർലൻഡ്‌സ്, ഒക്ടോബർ 2ന് ന്യൂസിലൻഡ്- ദക്ഷിണാഫ്രിക്ക മത്സരങ്ങളാണ് കാര്യവട്ടത്ത് നടക്കുക. സെപ്റ്റംബർ 29 മുതൽ ഒക്ടോബർ മൂന്ന് വരെയാണ് സന്നാഹമത്സരങ്ങൾ.
ഒക്ടോബർ 5നാണ് ഇന്ത്യ വേദിയാകുന്ന ഏകദിനലോകകപ്പിന് തുടക്കമാകുക. അഹമ്മദാബാദിലെ നരേന്ദ്രമോദി സ്‌റ്റേഡിയത്തിലാണ് ഉദ്ഘാടന, ഫൈനൽ മത്സരങ്ങൾ നടക്കുക. 46 ദിവസം നീണ്ട് നിൽക്കുന്ന ടൂർണമെന്റിൽ മൂന്ന് നോക്കൗട്ട് മത്സരങ്ങൾ ഉൾപ്പെടെ 48 മത്സരങ്ങളുണ്ടാകും.
