ആലപ്പുഴ: പാർട്ടിക്കുളളിലെ വിഭാഗീയതയെ തുടർന്ന് ആലപ്പുഴ സിപിഎമ്മിൽ വീണ്ടും അച്ചടക്ക നടപടി. സിപിഎം കുട്ടനാട് ഏരിയ കമ്മിറ്റി അംഗം കെഎസ് അജിത്തിനെ പാർട്ടിയിൽ നിന്നും പുറത്താക്കി. രാമങ്കരി പഞ്ചായത്ത് പ്രസിഡന്റ് രാജേന്ദ്രകുമാറിനെതിരെയും നടപടി സ്വീകരിച്ചിട്ടുണ്ട്. വിഭാഗീയ പ്രവർത്തനങ്ങൾ നടത്താൻ മുന്നിൽ നിന്ന് പ്രവർത്തിച്ചു എന്ന് ആരോപിച്ചാണ് ഇരുവർക്കുമെതിരെ നടപടിസ്വീകരിച്ചിരിക്കുന്നത്. രാജേന്ദ്രകുമാറിനെ തിരുവിതാംകൂർ കർഷക തൊഴിലാളി യൂണിയൻ ജനറൽ സെക്രട്ടറി, കെഎസ്‌കെടിയു ജില്ലാ ജോയിന്റ് സെക്രട്ടറി സ്ഥാനങ്ങളിൽ നിന്ന് നീക്കം ചെയ്തു.
ജോസ് തോമസിനെ കർഷക തൊഴിലാളി യൂണിയൻ ജനറൽ സെക്രട്ടറിയാക്കിയിട്ടുണ്ട്. ആലപ്പുഴ സിപിഎമ്മിലെ ഔദ്യോഗിക പക്ഷമായിരുന്ന മന്ത്രി സജി ചെറിയാൻ വിഭാഗത്തിന്റെ വിരുദ്ധ പക്ഷത്തുള്ള നേതാവാണ് ജോസ് തോമസ്. വിഭാഗീയ പ്രവർത്തനങ്ങളിൽ ഏർപ്പെട്ടെന്ന് കണ്ടെത്തിയവർക്കെതിരെ ലോക്കൽ തലങ്ങളിൽ നടപടി സ്വീകരിക്കാനും ജില്ലാ സെക്രട്ടറിയേറ്റിന്റെ നിർദ്ദേശമുണ്ട്.
