ചെസ് ലോകകപ്പില് ഇന്ത്യന് പ്രതീക്ഷകള്ക്ക് തിരിച്ചടി. വിജയിയെ നിര്ണയിക്കുന്ന ടൈബ്രേക്കറില് ഒന്നര പോയിന്റ് നേടി ലോക ഒന്നാം നമ്പര് താരമായ നോര്വെയുടെ മാഗ്നസ് കാള്സണ് തന്റെ ആദ്യ ലോകകിരീടം നേടി.റണ്ണറപ്പായ പ്രജ്ഞാനന്ദയ്ക്ക് 66,13,444 രൂപയാകും സമ്മാനമായി ലഭിക്കുക. വിജയിക്ക് ഏകദേശം 90,93,551 ഇന്ത്യന് രൂപയാണ് സമ്മാനത്തുക.കലാശ പോരിന്റെ ആദ്യ രണ്ടുമത്സരങ്ങളും സമനിലയില് ആയിരുന്നു. അഞ്ചുതവണ ലോക ചാമ്പ്യന്ഷിപ്പ് നേടിയ കാള്സന്റെ ആദ്യ ലോക കിരീടമാണിത്. ഫാബിനോ കരുവാനയാണ് മൂന്നാം സ്ഥാനത്ത്.
ചെസ് ലോകകപ്പ് ചരിത്രത്തില് മാഗ്നസ് കാള്സണും ആര് പ്രജ്ഞാനന്ദയും ആദ്യമായാണ് മുഖാമുഖം വന്നത്. അഞ്ച് തവണ ലോക ചാമ്പ്യനായ മാഗ്നസ് കാള്സണെ കലാശപ്പോരിലെ ആദ്യ രണ്ട് ഗെയിമുകളിലും സമനിലയില് തളച്ചത് 18-കാരനായ ഇന്ത്യന് താരത്തിന്റെ ഏറ്റവും മികച്ച നേട്ടമാണ്. ആദ്യ മത്സരത്തില് 35ാം നീക്കത്തിലും രണ്ടാം മത്സരത്തില് 30ാം നീക്കത്തിനൊടുവിലുമാണ് ചെസിലെ അതികായനായ 31-കാരനെ സമനിലയില് തളയ്ക്കാന് ഇന്ത്യയുടെ അഭിമാന താരത്തിന് കഴിഞ്ഞു.
കലാശ പോരിലെ രണ്ട് ഗെയിമുകളും സമനിലയില് അവസാനിച്ചതോടെയാണ് ചെസ് ലോകകപ്പ് പോരാട്ടം ടൈബ്രേക്കറിലേക്ക് നീണ്ടത്. ടൈബ്രേക്കറിലെ ആദ്യ ഗെയിം അവസാന മിനുറ്റുകളിലെ അതിവേഗ നീക്കങ്ങളില് മാഗ്നസ് കാള്സണ് സ്വന്തമാക്കി. രണ്ടാം ഗെയിമില് പ്രജ്ഞാനന്ദ സമനില വഴങ്ങിയതോടെ കാള്സണ് കിരീടം സ്വന്തമാക്കുകയായിരുന്നു.2005ല് നോക്കൗട്ട് ഫോര്മാറ്റ് നിലവില് വന്ന ശേഷം ലോകകപ്പ് ഫൈനലിലെത്തുന്ന ആദ്യ ഇന്ത്യക്കാരനും പ്രജ്ഞാനന്ദയാണ്.
