വിവിധ തരത്തിലുള്ള സാമ്പത്തിക തട്ടിപ്പുകളുടെ ഇരയാക്കപ്പെടുന്നവരുടെ വാർത്തകൾ അനുദിനം വർദ്ധിച്ചു വരികയാണ്. ഇവയിൽ ഈ അടുത്തായി വർദ്ധിച്ചു വരുന്ന ഒന്നാണ് ചെക്കുകളുമായി ബന്ധപ്പെട്ട തട്ടിപ്പുകൾ. ചെക്ക് മറ്റൊരാൾക്ക് കൈമാറുന്നതിന് മുമ്പ് തന്നെ തുകയുൾപ്പെടെ എല്ലാം കൃത്യമാണെന്ന് വിലയിരുത്തേണ്ടതുണ്ട്. അക്കൗണ്ട് ഉടമയുടെ പേര്, തീയതി, എന്നിങ്ങനെ എല്ലാ വിവരങ്ങളും പരിശോധിക്കണം. ഇതിന് പുറമേ ചെക്ക് കൈമാറുന്നതിന് മുമ്പ് ഇതിലെ നമ്പർ രേഖപ്പെടുത്തി സൂക്ഷിക്കേണ്ടതും അനിവാര്യമാണ്. എന്തെല്ലാം കാര്യങ്ങളാണ് പ്രധാനമായും ശ്രദ്ധിക്കേണ്ടതെന്ന് നോക്കാം..
സ്ഥിരമായി അക്കൗണ്ട് പരിശോധിക്കുക
ഉപയോക്താക്കൾ സ്ഥിരമായി അക്കൗണ്ട് പരിശോധിക്കുകയും ബാങ്ക് സ്റ്റേറ്റ്മെന്റ് വിലയിരുത്തേണ്ടതുമുണ്ട്. ചെക്ക് തട്ടിപ്പുകാർക്കെതിരെയുള്ള ആദ്യ പ്രതിരോധ മാർഗ്ഗം ഇതാണ്. ക്ലിയർ ചെയ്ത ചെക്കുകൾ ഉൾപ്പെടെ സ്ഥിരമായി പരിശോധിച്ച് വരികയാണെങ്കിൽ ഇത് സംശയാസ്പദമായ വിവരങ്ങൾ പെട്ടെന്ന് കണ്ടെത്താൻ സഹായിക്കുന്നു. എന്തെങ്കിലും തരത്തിലുള്ള സംശയം തോന്നിയാൽ ഉടൻ തന്നെ ബാങ്കുമായി ബന്ധപ്പെടേണ്ടതാണ്.
ചെക്ക് ബുക്ക് സുരക്ഷിതമായി സൂക്ഷിക്കുക
ചെക്ക് ബുക്കുകൾ നഷ്ടപ്പെട്ട് പോകാതെ സുരക്ഷിതമായി കയ്യിൽ ഉണ്ടെന്ന് ഉറപ്പു വരുത്തേണ്ടതുണ്ട്. ഇതിന് പുറമേ ചെക്ക് നമ്പറുകളും കൃത്യമായി ട്രാക്ക് ചെയ്യേണ്ടതാണ്. കൃത്യമായ വിലയിരുത്തലിൽ ചെക്ക് ലീഫ് നഷ്ടമായിട്ടുണ്ടെങ്കിൽ പെട്ടെന്ന് മനസിലാക്കാനാകും.
ജാഗ്രതയോടെ ചെക്കുകളിൽ ഒപ്പു വെയ്ക്കുക
ചെക്കുകളിൽ ഒപ്പു വെയ്ക്കുമ്പോൾ കൃത്യതയും വൃത്തിയും ഉണ്ടാകണം. ബ്ലാങ്ക് ചെക്കുകളിൽ മുൻകൂട്ടി ഒപ്പിട്ടു വെയ്ക്കുന്നതും ഒപ്പിട്ടു നൽകുന്നതും ഒഴിവാക്കേണ്ടതുണ്ട്. എല്ലാ ഭാഗങ്ങളും കൃത്യമായി പൂരിപ്പിച്ചിട്ടുണ്ടെന്ന് ഉറപ്പു വരുത്തിയ ശേഷം മാത്രം ചെക്ക് കൈമാറാൻ ശ്രമിക്കുക.
വിവരങ്ങൾ കൈമാറുന്നതിലും ജാഗ്രതയുണ്ടാവണം
വ്യക്തിപരമായതും സാമ്പത്തികപരമായ വിവരങ്ങൾ എപ്പോഴും സുരക്ഷിതമായി സൂക്ഷിക്കേണ്ടതുണ്ട്. ബാങ്ക് അക്കൗണ്ട് നമ്പർ, ചെക്ക് നമ്പർ എന്നിവ ഒരിക്കലും ഫോണിലൂടെയോ അല്ലാതെയോ അപരിചിതർക്ക് കൈമാറാൻ പാടില്ല. ഇനി ഉപയോഗമില്ല എന്നുറപ്പുള്ള രേഖകൾ നശിപ്പിച്ചു കളയാനും ശ്രദ്ധിക്കണം. ക്യാൻസലായ ചെക്കുകൾ, പഴയ ബാങ്ക് സ്റ്റേറ്റ്മെന്റുകൾ എന്നിങ്ങനെയുള്ളതൊന്നും സൂക്ഷിച്ചു വെക്കേണ്ടതില്ല.
