ഓണക്കാലത്തെ അത്തച്ചമയങ്ങളിൽ ഒഴിച്ചുകൂടാനാകാത്ത പൂവാണ് തുമ്പപ്പൂ. അത്തം മുതൽ പത്താം നാൾ തിരുവോണത്തിന്റെ അന്ന് വരെ അത്തപ്പൂക്കളത്തിൽ തുമ്പപ്പൂവിന് സ്ഥാനമുണ്ട്. എന്തുകൊണ്ടാണ് മറ്റുപൂവുകളെ അപേക്ഷിച്ച് തുമ്പപ്പൂവിന് ഇത്രയധികം പ്രാധാന്യമെന്ന് നോക്കാം..
പിന്നിലുള്ള ഐതിഹ്യങ്ങൾ
മഹാബലി എഴുന്നള്ളുന്നത് കാണുന്നതിനായി നാട്ടിലെ പൂക്കളെല്ലാം നന്നായി അണിഞ്ഞൊരുങ്ങി തലയുയർത്തി നിന്നു. ഓരോ പൂവിനും വ്യത്യസ്ത ഭംഗിയും ഗന്ധവുമായിരുന്നു ഉണ്ടായിരുന്നത്. എന്നാൽ ഇതിൽ ഒന്നും പെടാതെ നിന്ന തുമ്പയെ അന്ന് മറ്റു പൂക്കളെല്ലാം കൂടി ചേർന്ന് കളിയാക്കി.
മഹാബലിക്ക് തുമ്പപ്പൂവിന്റെ അവസ്ഥ മനസിലാകുകയും തുമ്പപ്പൂവിനെ എടുത്ത് മൂർധാവിൽ വെച്ച് ഇനി മുതൽ ഞാൻ വരുമ്പോൾ നീ മുന്നിൽ നിൽക്കണം എന്ന് പറയുകയും ചെയ്തു. അന്ന് മുതലാണത്രെ തുമ്പപ്പൂവിന് ഓണത്തിനിത്ര പ്രാധാന്യം ലഭിക്കാൻ തുടങ്ങിയത്.
മറ്റൊരു കഥ എന്തെന്നാൽ മഹാബലി ഒരു ശിവഭക്തനായിരുന്നു.ശിവന്റെ ഇഷ്ടപുഷ്പങ്ങളിൽ ഒന്നാണ് തുമ്പപ്പൂവ്. ഇതിനാലാണ് ശിവ ഭക്തനായ മഹാബലിയുടെ വരവിനായി തുമ്പപ്പൂവിട്ട് അലങ്കരിക്കുന്നത് എന്നും പറയപ്പെടുന്നു.
സാധാരണ കർക്കിടകം തുടങ്ങുമ്പോൾ തന്നെ പാടത്തും പറമ്പിലുമായി നിറഞ്ഞിരുന്ന തുമ്പപ്പൂ ഇന്ന് കിട്ടാക്കനിയാണ്. വയലും കൃഷിയിടങ്ങളും മൺമറഞ്ഞപ്പോൾ തുമ്പപ്പൂവിനെയും അത് ബാധിച്ചു എന്നതാണ് വാസ്തവം.
