ജനപ്രിയ വാഹന നിർമ്മാണ കമ്പനികളിലൊന്നായ ടാറ്റ മോർട്ടോഴ്സ് ഇന്ത്യൻ വിപണി കീഴടക്കാൻ ടാറ്റ നെക്സോണിനെ അടിമുടി പുതുക്കി അവതിരിപ്പിക്കാൻ പോകുകയാണ്. ടാറ്റ നെക്സോൺ ഫേസ്ലിഫ്റ്റ് സെപ്റ്റംബർ 14-ന് വിപണികളിലേക്കെത്തും. ഇതിനോടൊപ്പം ടാറ്റ നെക്സോൺ ഇവിയുടെ ഫേസ്ലിഫ്റ്റ് പതിപ്പും ഇന്ത്യയിൽ എത്തുമെന്നാണ് പുറത്തു വരുന്ന വിവരങ്ങൾ. മികച്ച മാറ്റങ്ങളോടെ പുറത്തിറങ്ങുന്ന നെക്സോൺ ഫേസ്ലിഫ്റ്റിനെ കുറിച്ച് കൂടുതലറിയാം..
ടാറ്റ നെക്സോൺ
നിലവിൽ രാജ്യത്ത് ഏറ്റവുമധികം വിറ്റഴിക്കപ്പെടുന്ന എസ് യുവികളിലൊന്നാണ് ടാറ്റ നെക്സോൺ. 2017-ലാണ് ടാറ്റ നെക്സോൺ ആദ്യമായി വിപണിയിലെത്തുന്നത്. ജനപ്രീതിയാർജിച്ച ഈ വാഹനത്തെ അടിമുടി മാറ്റി കൂടുതൽ ആധിപത്യം നേടാൻ ഒരുങ്ങുകയാണ് കമ്പനി.
പുതിയ ഡിസൈൻ
നെക്സോണിന്റെ മാറ്റിയ പതിപ്പിൽ അലോയ് ചക്രങ്ങളും അവയുടെ വശങ്ങളിലെ ചെറിയ മാറ്റങ്ങളുമാണുള്ളത്. വാഹനത്തിന്റെ പിൻഭാഗത്തായി പുതിയ ഇൻസെർട്ടുകളും Y- ആകൃതിയിലുള്ള പാേറ്റണും ട്വീക്ക് ചെയ്ത് ടെയിൽഗേറ്റും ഉണ്ടായിരിക്കും. എൽ. ഇഡി ടെയിൽ ലാമ്പുകളോടെയാണ് ഈ കാർ വിപണിയിലിറങ്ങുന്നത്. കൂടാതെ മാറ്റി നിർമ്മിച്ച ബമ്പറും റിഫ്ളക്ടറുകളും വാഹനത്തിൽ ഉണ്ടായിരിക്കും.
ഇന്റീരിയർ ഡിസൈൻ
ടാറ്റ മോട്ടോഴ്സിന്റെ ഈ പുതുക്കിയ കാർ പതിപ്പിൽ ഡാഷ്ബോർഡിനും സെൻസർ കൺസോളിനുമൊപ്പം ഇല്ലുമിനേറ്റഡ് ലോഗോയുമായിട്ടാണ് പുതിയ ടു-സ്പോക്ക് സ്റ്റിയറിങ് വീൽ വരുന്നത്. ഇതിനു പുറമെ കപ്പാസിറ്റീവ് കൺട്രോളുകൾ, സ്ലീക്കർ എസി വെന്റുകൾ, 360-ഡിഗ്രി ക്യാമറ സിസ്റ്റം, വയർലെസ് ചാർജിങ് സൗകര്യം എന്നിവ ഉൾപ്പെടെയുള്ള വലിയ മാറ്റങ്ങളാണ് പുതിയ നെക്സോൺ കാറിന് കമ്പനി നൽകിയിരിക്കുന്നത്.
എഞ്ചിൻ ഓപ്ഷനുകൾ
1.2 ലിറ്റർ ത്രീ-പോട്ട് റിവട്രോൺ ടർബോ പെട്രോൾ എഞ്ചിൻ, 1.5ലിറ്റർ ഫോർ സിലിണ്ടർ റിവോടോർക്ക് ടർബോ ഡീസൽ എഞ്ചിൻ പതിപ്പുകളിലാണ് വാഹനം എത്തുന്നത്. 120 പിഎസ് പവറാണ് പെട്രോൾ എഞ്ചിൻ നൽകുന്നത്. 110 പിഎസ് പവറാണ് ഡീസൽ എഞ്ചിൻ വാഹനത്തിന് നൽകുന്നത്.
