ന്യൂഡൽഹി: തെലുങ്ക് നടനും ഏകീകൃത ആന്ധ്രാപ്രദേശ് മുൻ മുഖ്യമന്ത്രിയുമായിരുന്ന എൻ.ടി രാമറാവുവിന്റെ ശതാബ്ദിയോട് അനുബന്ധിച്ച് പ്രത്യേക നാണയം പുറത്തിറക്കി. 100 രൂപയുടെ നാണയമാണ് രാഷ്ട്രപതി ദ്രൗപദി മുർമു പുറത്തിറക്കിയത്. രാഷ്ട്രപതി ഭവൻ കൾച്ചറൽ സെന്ററിൽ നടന്ന ചടങ്ങിലാണ് നാണയം പ്രകാശനം ചെയ്തത്. തെലുങ്ക് സിനിമകളിലൂടെ എൻടിആർ ഇന്ത്യൻ സിനിമയെയും സംസ്കാരത്തെയും സമ്പന്നമാക്കിയെന്ന് രാഷ്ട്രപതിഭവൻ പ്രസ്താവനയിൽ പറഞ്ഞു.
രാമായണത്തിലെയും മഹാഭാരതത്തിലെയും പ്രധാന കഥാപാത്രങ്ങൾക്ക് അദ്ദേഹം തന്റെ അഭിനയത്തിലൂടെ ജീവൻ നൽകി. അദ്ദേഹം അവതരിപ്പിച്ച ശ്രീരാമന്റെയും ശ്രീകൃഷ്ണന്റെയും കഥാപാത്രങ്ങൾ വളരെ സജീവമായതിനാൽ ആളുകൾ എൻടിആറിനെ ആരാധിക്കാൻ തുടങ്ങി. എൻടിആർ തന്റെ അഭിനയത്തിലൂടെ സാധാരണക്കാരുടെ വേദന പ്രകടിപ്പിച്ചു എന്നും രാഷ്ട്രപതി പറഞ്ഞു.
തന്റെ ചിത്രങ്ങളിലൂടെ എൻടിആർ സാമൂഹ്യനീതിയുടെയും സമത്വത്തിന്റെയും സന്ദേശം പ്രചരിപ്പിച്ചു. ഒരു പൊതുപ്രവർത്തകൻ എന്ന നിലയിലും നേതാവെന്ന നിലയിലും എൻടിആറിന്റെ ജനപ്രീതി ഒരുപോലെ വിശാലമാണ്. അസാധാരണമായ വ്യക്തിത്വത്തിലൂടെയും കഠിനാധ്വാനത്തിലൂടെയും അദ്ദേഹം ഇന്ത്യൻ രാഷ്ട്രീയത്തിൽ അതുല്യമായ ഒരു അദ്ധ്യായം സൃഷ്ടിച്ചെന്നും രാഷ്ട്രപതി പറഞ്ഞു.
അദ്ദേഹം നിരവധി ജനക്ഷേമ പരിപാടികൾക്ക് തുടക്കമിട്ടു. അത് ഇന്നും ഓർമ്മിക്കപ്പെടുന്നു. എൻടിആറിന്റെ അതുല്യ വ്യക്തിത്വം ജനങ്ങളുടെ പ്രത്യേകിച്ച് തെലുങ്ക് സംസാരിക്കുന്ന ആളുകളുടെ ഹൃദയത്തിൽ എപ്പോഴും ഉറച്ച് നിൽക്കുന്നു. സ്മാരക നാണയം കൊണ്ടുവന്ന കേന്ദ്ര ധനമന്ത്രാലയത്തെ രാഷ്ട്രപതി അഭിനന്ദിച്ചു.
Comments