ഈ വർഷത്തെ ഓണത്തിന്റെ പ്രത്യേകത മകളുടെ വിവാഹമാണെന്ന് നടൻ സുരേഷ് ഗോപി. അതിനാൽ അടുത്ത ജനുവരിയിലാകും കുടുംബത്തിന്റെ ഓണമെന്നും അദ്ദേഹം പറഞ്ഞു. ഇപ്പോൾ മകളുടെ വിവാഹവുമായി ബന്ധപ്പെട്ട തിരക്കിലാണെന്നും സുരേഷ് ഗോപി പറഞ്ഞു. തിരുവോണ ദിനത്തിൽ മാദ്ധ്യമങ്ങളോട് സംസാരിക്കുകയായിരുന്നു നടൻ.
വിവാഹവുമായി ബന്ധപ്പെട്ട വീട് പണികൾ ഇപ്പോൾ നടക്കുകയാണ്. 26 വർഷത്തിന് ശേഷം വീട്ടിലൊരു ചടങ്ങ് നടക്കുകയാണ്. ഞാനും ഭാര്യയും കല്യാണപ്പെണ്ണും ദിക്കുകൾ ചുറ്റി കല്യാണത്തിന് വേണ്ട ഒരുക്കങ്ങൾ നടത്തുന്നുവെന്നും സുരേഷ് ഗോപി പറഞ്ഞു. കൂടാതെ, സിനിമകളുടെ രണ്ടാം ഭാഗം ചെയ്യാൻ ബുദ്ധിമുട്ടാണ്. പണ്ടത്തെ സിനിമകളിലെ പലരും ഇപ്പോൾ ജീവിച്ചിരിപ്പില്ല. ചാക്കോച്ചി ചിലപ്പോൾ വേറൊരു സിനിമയായി വന്നേക്കാമെന്നും അദ്ദേഹം കൂട്ടിച്ചേർത്തു.
കഴിഞ്ഞ മാസമായിരുന്നു ഭാഗ്യ സുരേഷിന്റെ വിവാഹ നിശ്ചയം കഴിഞ്ഞത്. മാവേലിക്കര സ്വദേശികളായ മോഹന്റെയും ശ്രീദേവിയുടെയും മകനായ ശ്രേയസ്സ് ബിസിനസ്സുകാരനാണ്. തിരുവനന്തപുരത്തെ വീട്ടിൽ വെച്ചായിരുന്നു നിശ്ചയം നടന്നത്.
