ആപ്പിൾ ഐഫോൺ 15 സീരിസ് സെപ്റ്റംബർ 12-ന് ലോഞ്ച് ചെയ്യും. കാലിഫോർണിയയിലെ സ്റ്റീവ് ജോബ്സ് തിയറ്ററിലെ ആപ്പിൾ പാർക്കിൽ നടക്കുന്ന ‘വണ്ടർലസ്റ്റ്’ പരിപാടിയിലാണ് ലോഞ്ച് ചെയ്യുന്നത്. ഇവന്റിൽ അവതരിപ്പിക്കുന്ന മറ്റ് ഉത്പന്നങ്ങളെ കുറിച്ച് ആപ്പിൾ വെളിപ്പെടുത്തിയിട്ടില്ല. ഐഫോൺ 15 സീരീസ്, ആപ്പിൾ വാച്ച് സീരീസ് 9, ആപ്പിൾ വാച്ച് അൾട്രാ 2, ഐഒഎസ് 17, വാച്ച് ഒഎസ് 10 എന്നിവയും അന്നേദിവസം ലോഞ്ച് ചെയ്യുമെന്നാണ് കരുതുന്നത്. ‘വണ്ടർലസ്റ്റ്’ എന്ന് പേരിട്ടിരിക്കുന്ന ഫാൾ ലോഞ്ച് ഇവന്റിനുള്ള ക്ഷണങ്ങൾ ആപ്പിൾ ഔദ്യോഗികമായി അയച്ചു. സെപ്റ്റംബർ 12ന് ആപ്പിൾ പാർക്കിൽ ഇന്ത്യൻ സമയം 10.30-നാണ് ഇവന്റ് നടക്കുന്നത്. ആപ്പിൾ ഡോട്ട് കോമിലും ആപ്പിൾ ടിവി ആപ്പിലും ലോഞ്ച് ഓൺലൈനായി തത്സമയം സംപ്രേക്ഷണം ചെയ്യും.
ഐഫോൺ 15, ഐഫോൺ 15 പ്ലസ്, ഐഫോൺ 15 പ്രോ, ഐഫോൺ 15 പ്രോ മാക്സ് എന്നിവ ഉൾപ്പെടുന്ന ഐഫോൺ 15 സീരീസിന്റെ വേരിയന്റുകൾ വരാനിരിക്കുന്ന ഇവന്റിൽ പുറത്തിറങ്ങുമെന്നാണ് കരുതുന്നത്. ഈ വേരിയന്റുകളുടെ സ്പെസിഫിക്കേഷനുകൾ, ഡിസൈൻ, കളർ ഓപ്ഷനുകൾ എന്നിവയെക്കുറിച്ച് ഇതിനകം തന്നെ നിരവധി വാർത്തകളാണ് സമൂഹമാദ്ധ്യമങ്ങളിൽ നിറഞ്ഞിരിക്കുന്നത്. ലൈറ്റനിംഗ് പോർട്ടിന് പകരം യുഎസ്ബി ടൈപ്പ്-സി ചാർജിംഗ് പോർട്ട് എത്തുന്നു എന്നതാണ് പ്രധാന ആകർഷണമായി ആരാധകർ കാണുന്നത്. ഐഫോൺ 15ന് ഫോണിന്റെ നിറത്തിലുള്ള ചാർജർ കേബിൾ ലഭിക്കുമെന്നാണ് റിപ്പോർട്ട്.
അതേസമയം, ഇവന്റിൽ കമ്പനി രണ്ട് പുതിയ സ്മാർട്ട് വാച്ചുകളും പുറത്തിറക്കുമെന്നും പ്രതീക്ഷിക്കുന്നു. ആപ്പിൾ വാച്ച് സീരീസ് 9, ആപ്പിൾ വാച്ച് അൾട്രാ 2. ആപ്പിൾ വാച്ച് സീരീസ് 9 എന്നിവയെത്തുമെന്നും പ്രതീക്ഷിക്കുന്നു. രണ്ടാം തലമുറ ആപ്പിൾ വാച്ച് അൾട്രാ മോഡൽ 3ഡി പ്രിന്റിംഗ് സാങ്കേതികവിദ്യ ഉപയോഗിച്ച് നിർമ്മിക്കുമെന്ന് റിപ്പോർട്ടുകൾ ഉണ്ടായിരുന്നു.
