ന്യൂഡൽഹി: പ്രത്യേക പാർലമെന്റ് സമ്മേളനം വിളിച്ച് ചേർത്ത് സർക്കാർ. സെപ്തംബർ 18 മുതൽ 22 വരെയാണ് സമ്മേളനം നടത്താൻ തീരുമാനിച്ചിരിക്കുന്നത്. രണ്ട് സഭകളിലായി അഞ്ച് സിറ്റിംഗുകളോടെയാണ് സമ്മേളനം വിളിച്ച് ചേർക്കുന്നത്. പാർലമെന്ററി കാര്യ മന്ത്രി പ്രൽഹാദ് ജോഷിയാണ് ഇക്കാര്യം അറിയിച്ചത്.
17-ാം ലോക്സഭയുടെ 13-ാം സമ്മേളനവും രാജ്യസഭയുടെ 261-ാം സമ്മേളനവുമാണിത്. പാർലമെന്റ് സമ്മേളനത്തിൽ നിരവധി ചർച്ചകളും സംവാദങ്ങളും നടത്തുമെന്നും വിവിധ വിഷയങ്ങൾ കേന്ദ്രീകരിച്ച് ചർച്ച നടത്തുമെന്നും പ്രൽഹാദ് ജോഷി ട്വിറ്ററിൽ കുറിച്ചു.
കഴിഞ്ഞ മാസം സമാപിച്ച പാർലമെന്റിന്റെ വർഷകാല സമ്മേളനം പഴയ പാർലമെന്റ് മന്ദിരത്തിലാണ് നടന്നത്.സാധാരണയായി നവംബർ അവസാന വാരമാണ് പാർലമെന്റ് സമ്മേളനം ആരംഭിക്കുന്നത്. ഈ വർഷാവസാനം നടക്കാനിരിക്കുന്ന അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പിന് മുന്നോടിയായാണ് ഇത്തവണ സമ്മേളനം നേരത്തെ നടത്താൻ തീരുമാനിച്ചിരിക്കുന്നത്.
