ജയ്പൂർ: പ്രമുഖ റൈഡർമാർ പങ്കെടുക്കുന്ന മോട്ടോജിപിക്ക് ഇന്ത്യ ആതിഥേയത്വം വഹിക്കും. ആദ്യമായാണ് ഇന്ത്യയിൽ മോട്ടോജിപിയ്‌ക്ക് അരങ്ങുണരുന്നത്. 19 രാജ്യങ്ങളിൽ നിന്നുള്ള റൈഡർമാർ പരിപാടിയിൽ പങ്കെടുക്കും. സെപ്റ്റംബർ 22 മുതൽ 24 വരെ ഗ്രേറ്റർ നോയിഡയിലെ ബുദ്ധ് ഇന്റർനാഷണൽ സർക്യൂട്ടിലാണ് റേസിംഗ് നടക്കുന്നത്. കഴിഞ്ഞ വർഷം മോട്ടോജിപിയും നോയിഡ ആസ്ഥാനമായുള്ള ഫെയർസ്ട്രീറ്റ് സ്‌പോർട്‌സും തമ്മിൽ കരാർ ഒപ്പിട്ടിരുന്നു. ഇത് രാജ്യത്ത് തൊഴിലവസരങ്ങൾ സൃഷ്ടിക്കുന്നതിനൊപ്പം വ്യാപാരത്തിനും ടൂറിസത്തിനും ഉണർവ്വും നൽകും.
ഇന്ത്യൻ റേസിംഗ് രംഗത്തേക്ക് മോട്ടോഇയെ എത്തിക്കാനും മോട്ടോജിപിക്ക് പദ്ധതിയുണ്ട്. ഏഷ്യയിലെ തന്നെ ആദ്യത്തെ കാർബൺ രഹിത റേസായിരിക്കും ഇത്. ബുദ്ധ് ഇന്റർനാഷണൽ സർക്യൂട്ട് ഒരു കാലത്ത് ഫോർമുല 1 ഇന്ത്യൻ ഗ്രാൻഡ് പ്രിക്‌സിന്റെ കേന്ദ്രമായിരുന്നു. 2011 മുതൽ 2013 വരെ തുടർച്ചയായി മൂന്ന് വർഷം ഇത് നടക്കുകയും ചെയ്തു. എന്നാൽ, പിന്നീട് സാമ്പത്തിക പ്രതിസന്ധി, നികുതി, ഉദ്യോഗസ്ഥതല തടസ്സങ്ങൾ എന്നിവ കാരണം അത് നിർത്തലാക്കപ്പെടുകയായിരുന്നു.
