ന്യൂഡൽഹി: “ഒരു രാഷ്ട്രം, ഒരു തിരഞ്ഞെടുപ്പ്” നിർദ്ദേശം നടപ്പിലാക്കുന്നതിനുള്ള സുപ്രധാന ചുവടുവെയ്പ്പ് നടത്തി കേന്ദ്രസർക്കാർ. ഈ വിഷയം പരിശോധിച്ച് റിപ്പോർട്ട് അവതരിപ്പിക്കാൻ കേന്ദ്ര സർക്കാർ ഒരു സമിതിയെ നിയോഗിച്ചു എന്ന് റിപ്പോർട്ടുകൾ സൂചിപ്പിക്കുന്നു.
‘ഒരു രാഷ്ട്രം, ഒരു തിരഞ്ഞെടുപ്പ്’ എന്നാൽ എല്ലാ സംസ്ഥാന അസംബ്ലികളിലേക്കും ലോക്‌സഭയിലേക്കും ഒരേസമയം തിരഞ്ഞെടുപ്പ് നടത്തുക എന്നാണ്. കേന്ദ്രസർക്കാർ പലപ്പോഴും ഈ നിർദ്ദേശത്തെ അനുകൂലിച്ചിരുന്നു.
പ്രധാനമന്ത്രി നരേന്ദ്ര മോദിയും ഭാരതീയ ജനതാ പാർട്ടിയും 2014 ലോക്സഭാ തെരഞ്ഞെടുപ്പിനുള്ള പ്രകടന പത്രികയിൽ ഈ ആശയത്തിന് പിന്തുണ പ്രഖ്യാപിച്ചിട്ടുണ്ട്.
1967 വരെ ഇന്ത്യയിൽ ഒരേസമയം തിരഞ്ഞെടുപ്പുകൾ പതിവായിരുന്നു, ഈ രീതിയിൽ നാല് തിരഞ്ഞെടുപ്പുകൾ നടന്നിരുന്നു. എന്നാൽ , 1968-69 ൽ ചില സംസ്ഥാന അസംബ്ലികൾ അകാലത്തിൽ പിരിച്ചുവിട്ടതിനെത്തുടർന്ന് ഈ രീതി നിർത്തലാക്കപ്പെട്ടു. തുടർന്ന്, കാലാവധിക്ക് ഒരു വർഷം മുമ്പ് ലോക്‌സഭ പിരിച്ചുവിട്ടു, ഇത് 1971-ൽ ഇടക്കാല തിരഞ്ഞെടുപ്പിലേക്ക് നയിച്ചു.
2014ലെ ലോക്സഭാ തിരഞ്ഞെടുപ്പ് പ്രകടനപത്രികയിൽ നിയമസഭാ, ലോക്സഭാ തെരഞ്ഞെടുപ്പുകൾ ഒരേസമയം നടത്തുന്ന രീതി കൊണ്ടുവരുമെന്ന് ബിജെപി വാഗ്ദാനം ചെയ്തിരുന്നു. പ്രകടനപത്രികയിൽ 14-ാം പേജിൽ ഇങ്ങനെ പറയുന്നു: “കുറ്റവാളികളെ ഉന്മൂലനം ചെയ്യുന്നതിനായി തിരഞ്ഞെടുപ്പ് പരിഷ്കാരങ്ങൾ ആരംഭിക്കാൻ ബി.ജെ.പി പ്രതിജ്ഞാബദ്ധമാണ്. മറ്റ് പാർട്ടികളുമായി കൂടിയാലോചിച്ച് നിയമസഭാ, ലോക്സഭാ തെരഞ്ഞെടുപ്പുകൾ ഒരേസമയം നടത്തുന്ന രീതി വികസിപ്പിക്കാൻ ബി.ജെ.പി ശ്രമിക്കും. തിരഞ്ഞെടുപ്പ് ചെലവ് കുറയ്‌ക്കുന്നതിന് പുറമെ. രാഷ്‌ട്രീയ പാർട്ടികൾക്കും സർക്കാരിനും ഇത് സംസ്ഥാന സർക്കാരുകൾക്ക് സ്ഥിരത ഉറപ്പാക്കും.
അടിക്കടിയുള്ള തെരഞ്ഞെടുപ്പുകൾ രാജ്യത്തിന്റെ വിഭവങ്ങളുടെ മേൽ ഭാരം അടിച്ചേൽപ്പിക്കുകയും ഭരണം തടസ്സപ്പെടുത്തുകയും ചെയ്യുന്നുവെന്നത് വസ്തുതയാണ്. 2019 ലെ ലോക്സഭാ തിരഞ്ഞെടുപ്പിന് ശേഷം ഈ വിഷയം ചർച്ച ചെയ്യാൻ സർവകക്ഷിയോഗം വിളിച്ചപ്പോൾ പല പ്രതിപക്ഷ പാർട്ടികളും യോഗത്തിൽ പങ്കെടുത്തിരുന്നില്ല.
