മലയാള സിനിമയെ വാനോളം പുകഴ്ത്തി പാക് നടി. ഇന്ത്യൻ സിനിമകൾക്കും ഇന്ത്യൻ സിനിമാ താരങ്ങൾക്കും പാകിസ്താനിൽ നിരവധി ആരാധകരാണുള്ളത്. ഷാരുഖ് ഖാൻ, അമിതാഭ് ബച്ചൻ തുടങ്ങിയ ബോളിവുഡ് താരങ്ങൾക്കും പാകിസ്താനിൽ ആരാധകർ ഏറെയാണ്. ഇപ്പോഴിതാ മലയാള സിനിമയെ പ്രശംസിക്കുന്ന പാക് നടിയുടെ വാക്കുകളാണ് സാമൂഹ്യമാദ്ധ്യമങ്ങൾ ഏറ്റെടുത്തിരിക്കുന്നത്. ഇന്ത്യൻ സിനിമകൾ മറ്റ് രാജ്യത്തെ സിനിമകളേക്കാൾ മികച്ചതാണ്. ഒരിക്കലെങ്കിലും എല്ലാവരും മലയാള സിനിമ കണ്ടിരിക്കണമെന്ന് പാക് താരമായ മാഹിറ ഖാൻ പറയുന്നു.
‘ കഥ കൊണ്ടും അവതരണം കൊണ്ടും മറ്റ് ഏത് ഭാഷകളെക്കാളും മികച്ചതാണ് മലയാള സിനിമ. മോഹൻലാലിനെ നേരിൽ കാണാൻ തനിയ്ക്ക് അവസരം ലഭിച്ചിട്ടുണ്ട്. മോഹൻലാലിന്റെ പല ഹിറ്റ് സിനിമകളും സംവിധായകൻ പ്രിയദർശൻ ഹിന്ദിയിലേക്ക് റീമേക്ക് ചെയ്തതൊക്കെ അവിടെ വലിയ ഹിറ്റുകളാണ്. മുമ്പ് മലയാള സിനിമയെ കുറിച്ച് കേട്ടുകേൾവി പോലും തനിക്ക് ഇല്ലായിരുന്നു. എന്നാൽ ഇന്ത്യൻ സിനിമാ നിരൂപകയായ അനുപമ ചോപ്രയാണ് മലയാള സിനിമയെ എനിക്ക് പരിചയപ്പെടുത്തി തന്നത്. അതിന് അനുപമയോട് നന്ദിയുണ്ട്. പാകിസ്താനിലുള്ള എന്റെ എല്ലാ ആരാധകരും മലയാള സിനിമ കാണണം- മാഹിറ പറഞ്ഞു.
